MermaidCharming MermaidCharming

آخر الأخبار

جاري التحميل ...

طريقة الأوزي باللحم المفروم | OUZI WITH MEAT AND SPICED RICE RECIPE

أوزي اللحم المفروم

بسم الله الرحمن الرحيم
كيف الأحوال
تجاوزنا نص شهر رمضان الفضيل كيف أحوالكم والعبادات في الشهر الكريم
يارب تكونوا سالمين أنتم وأحبابكم
استكمالا لأفكار الإفطار هنعمل سوا اليوم على الفطار وصفة حلوة جدااا من المطبخ الشاميوهي 
الأوزي باللحم المفروم
صاحبتي اللي قالتلي الوصفة دي مكنتش أعرفها حقيقي بس طلعت جميلة وسهلة وطيبة وشهبة جدا فشكرا ليها جدااا

يتميز المطبخ الشامي أنهم بيدخلوا في وجباتهم الخضار بشكل جميل وطيب وطعمه بيكون تحفة مع الأكل والأكل الشامي فعلا من أطيب الأكلات 
يلا بينا نبدأ وصفة اليوم

المكونات
400 جرام لحم مفروم
كوب بازلاء خضراء
كوب ونص أرز بسمتي أو أرز مصري حسب المتوفر
في حالة الارز البسمتي 3 أكواب مرق (شوربة) أو ماء حسب المتوفر
في حالة الأرز المصري مقدار الأرز مقدار الماء
كوب جزر قطع صغيرة (كان اختياري الوصفة الأصلية مش كوجود فيها)
ملح
فلفل أسمر
بهارات مشكلة
حبهان مطحون
صنوبر
لوز أو سوداني حسب المتوفر
عود قرفة -ورق لورى- حبوب حبهان للرز (للأرز)
ورق جلاش
زبدة

الطريقة:
الصور هتوضحلكم الخوات وهي طريقة سهلة وجميلة في التقديم في الآخر

أولا طريقتي في تحضير اللحم المفروم والبازلاء
أنا مش بضيف مادة دهنية للحمة بعتمد أنها بيكون فيها نسبة دهون
في طاسة ساخنة على النار نضيف اللحم المفروم  ونرش عليه معلقة فلفل أسمر ونبدأ نقلب فيه لحد ما لونه يغير
بعدها نضيف كوب الجزر  ونتركهم معا ولما يبدأ الجزر يدخل في التسوية نضيف كوب البازلاء
ونضيف معلقة صغيرة حبهان مطحون ومعلقة قرفة صغيرة والملح وممكن بهارات مشكلة (حسب ذوقكم)
وهقولكم على TIP لو عاوزين لون البازلاء يفضل أخضر وحلو ضيفوا معلقة صغيرة سكر بتدي طعم حلو وكمان بتحافظ على لون البازلاء أخضر.
كده خلصنا اللحم المفروم



ثانيا نبدأ تحضير الأرز
في الحلة على النار نضيف المادة الدهنية زيت أو زبدة حسب الرغبة
ونحمر فيها الصنوير واللوز والسوداني بتاعنا ولما يتحمر نطلعه من المادة الدهنية
وننزل مكانه مباشرة في نفس الحلة عود القرفة وورقتين لورا و3 حبات حبهان
وبعدها نضيف الأرز ونقلبه في الحلة الأول مع المادة الدهنية
وبعدها نضيف المرق أو الماء الساخن والملح ومعلقة صغيرة من البهارات المشكلة ورشة حبهان مطحون
ونتركه  حتى ينضح

ثالثا
نضيف اللحم المفروم والبازلاء على الأرز ونقلبهم سوا ممكن يتقدم كده وممكن الخطوة اللي جاية

رابعا 
محتاجين ورق الجلاش وزبدة مذابة (الخطوات سهلة وأتمني تكون واضحة في الصور)
في طبق فاضي أو بولة على حسب المقاس اللي عاوزينه 
نضع أول ورقة جلاش جوه الطبق تأخذ شكل الطبق وبعدها الورقة التانية 
بين الورقتين مسحة صغيرة  بالزبدة المذابة (نفس اللي بنعمله في الجلاش العادي) وبعدها نضيف الورقة الثالثة 
وبعدها نملأه البولة المبطنة بورق الزبدة بالأرز بتاعنا اللي حضرناه  ونساويه كويس 
ونقفله وبين كل ورقة وورقة وأحنا بنقفله مسحة زبدة خفيفة ونطلع من البولة بتاعتنا على الصينية اللي هتدخل الفرن وندهن الوش بالزبدة




ونكرر ثاني في الطبق الثاني وهكذا 
الكمية دي عملت معايا 3  من الحجم الكبير  ممكن لو البولة حجمها أصغر تعمل عدد أكبر 

وعلى فرن ساخن 200 درجة  ندخله الفرن ولما يجمر من تحت 
نشغل الشواية ويأخد اللون الذهبي الجميل من فوق 
وكده جاهز للأكل والتقديم 
ومن المفضلات جنبه في التقديم سلطة الزبادي الساقعة بتزود لطعمه جمال.
طعمه جميل جدااا بشهادة اللي ذاقه وكانت كمان اول تجربة 
هيعجبكم إن شاء الله 
هني وعافية 
دمتم جميلات
طريقة الأوزي باللحم المفروم




عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming