MermaidCharming MermaidCharming

آخر الأخبار

جاري التحميل ...

فوائد زيت بذور الورد | ROSEHIP OIL

زيت بذر الورد

بسم الله الرحمن الرحيم
صباح/مساء الورد 
بما أن كلامنا النهاردة عن زيت بذر الورد
فبيقي يارب يومك جميل زي الورد
يلا نبدأ كلامنا 

مبسوطة اوي وأنا بكتب الموضوع ده و نفسي أغطي كل حاجة فيه 
لأني فعلا من عشاق السيرم أو زيت الورد وما بقدر أستغنى عنه ولما بيخلص بكرره تاني و بحسه فعلا سر من أسرار الجمال زي ما كنت بسمع دايما عنه 

أولا زيت بذر الورد هو زيت جاف معصور على البارد
يعني ايه زيت جاف : يعني زيت بيبقى امتصاصه أسرع من الزيت العادي و كمان بيدى ملمس مخملي للبشرة من غير الأحساس الدهني.

ومن مزايا الزيت الجاف عادة إنه بيبقى متعدد الاستخدامات يعني ممكن استخدمه للجسم الكوع الركبة وممكن فى ماء الشاور يزود ترطيب الجسم و ممكن التدليك بيدخل فى حاجات كتير جدا، ومفيد للأظافر يمكن تدليك الأظافر بيه قبل النوم لتقويتها وحمايتها من التكسير.

نكمل كلامنا عن الروز هيب و فيه كريمات حاليا بتعمل نفس فكرة الزيت الجاف متعدد الاستخدام أو كمان متوفر حاليا كريمات بالروز هيب مش بس oil
.
فوائد زيت بذر الورد المعصور على البارد

زي ما قولنا هو زيت جاف بيتم استخلاصه من عصر بذور ثمر الورد  من الجزء الأوسط فى الورد (مركز الوردة ) بعد ما كل ورق الوردة PETALS يجف و يقع و يتفضل الروز هيب وبيبدأ استخلاص الزيت الموجود به على البارد cold pressed  وهي الطريقة الأنسب للحصول على أقصى استفادة  منه وميفقدش قيمته.


هو زيت غني بمضادات الأكسدة والأحماض الدهنية  زي الأوميجا  3 و 6 و 9 و بفيتامينات زي  a c e 

و طبعا معروفة المواد دي فوائدها للبشرة و قد ايه بتدي نضارة وبترطب وتنقي وتعقم البشرة.

فوائد زيت بذور الورد للبشرة:

لأنه زيت غني بالعديد والعديد من الفيتامينات فبحسه بطل من أبطال روتين البشرة اللي لا يمكن الاستغناء عنه.

1- تعقيم البشرة: 

بما إنه غني بالفيتامينات وله خصائص مقاومة للبكتريا والفطريات وبيساعد في علاج البشرة من الالتهابات حيث إنه بيحتوي أيضا على مواد مضادة للالتهاب anti inflamatory تعمل على تهدئة البشرة والحد من تهيجها أو آثار الحروق مثل الحروق الناتجة عن الشمس.
يساعد في الإسراع من علاج البشرة المصابة بحب الشباب وتصفية البشرة من الشوائب وتنقيتها.
من الزيوت المفيدة في العناية بالبشرة في حالات الإكزيما والصدفية حيث إنه غني بفيتامين E المعروف بخصائصه المضادة للأكسدة وللإلتهابات.

2- يحسن من تدفق الدورة الدموية للبشرة عند التدليك به للبشرة في شكل دائري.

3- يعتبرعلاج لعلامات التقدم بالسن وبيقلل من الخطوط الرفيعة والتصبغات و بيرطب البشرة وكمان بيجدد خلايا البشرة لأنه غني بفيتامين a اللى يعتبر كنز وبيكافح التصبغات وآثار الحبوب وآثار الشمس وبيقلل من شكل الهالات السوداء حول العين والغمقان حول الفم.

 4- إعادة التوازن لبشرتنا وخاصة في فترة إختلال الهرمونات (فترة الطمث) خلال الفترة دي بيظهر لنا بشكل مزعج حبوب مؤلمة وبتكون ملتهبة عن تجربة سيرم بذور الورد بيخفف منها جدا وبتختفي سريعا من غير آثر.

5- يساعد على تحفيز إنتاج الكولاجين الضروري للحفاظ على شباب البشرة بما إن زيت بذور الورد يحتوي على فيتامين A, C الأساسين في إنتاج الكولاجين ووقف نشاط الإنزيمات المسئولة عن تكسير الكولاجين في الجلد.

مميزات زيت بذور الورد:

1- مناسب لكل أنواع البشرة
حتى البشرة الحساسة مناسب ليها وحتى لو بشرة فيها حبوب هيساعدها تقل وبيعمل كمان إنه يقلل آثر التصبغات والحبوب و ليه تجارب كتير فى معامل أثبتت كده و بلوجرز كمان أجانب كثير على مدوناتهم حكوا تجاربهم معاه
و أصلا سبب شهرته فى عالم التجميل كانت الممثله ميرندا كير من كام سنة
لما قالت إنه السبب في بشرتها الصحية المشرقة و إنه سبب النضارة ودى أيقونة من إيقونات الجمال.

2- قوامه خفيف ومش بيلزق

لدرجة تححس إنه سيرم مش زيت من سرعة تشرب الجلد ليه

لونه أصفر غامق مائل للبرتقالي 

ده و لونه المعتاد ممكن يبقي أغمق شوية على حسب الورد المعصور بس عادة بيبقى لونه كده
رائحته مش حلوة صراحة بس مش بتدوم أوي بعد ما تحطيه شوية و هتلاقيها اختفت
زيت بذر الورد

طريقة استخدام زيت بذور الورد للبشرة

بستخدم بليل بعد ما أخلص روتين بشرتي 

نقطتين منه بيكفي جدا بعمل بيه مساج لبشرتي في شكل دائري والبشرة بتشربه بسرعة وبتحسى بنضارة جدا تاني يوم الصبح.


طريقة حفظ زيت بذور الورد:

هو زيت حساس للحرارة لذا عادة بحتفظ بيه فى درجة حرارة باردة وممكن بس بعد ما تفتحيه تحتفظي بيه في الثلاجة بعيدا عن الحرارة العالية  حفاظا عليه من الأكسدة
وبسبب حساسيته للحرارة والضوء هنلاقي علبته لونها غامق علشان نحافظ عليه من الأكسدة وإنه يفقد فوائده.

العبوة بتقعد معايا كتير جدا أكثر من 5 شهور و لما خلصت جبت تاني 

بتشريه من موقع أيهرب أو ممكن أونلاين من السيلر التراستد بنات فيه أنواع و براندات كتير اللى بستخدمه فى الفترة الاخيره من شركة LIFE-FLO جميل جداا
والقطارة تبعه جميلة وبتساعدك جدا في التحكم في كمية السيرم من غير ما تهدر.

و ده كود اي هيرب لو حابين تستخدموه بيديكم خصم إضافي على الأوردر بتاعكم AGY9953

كود خصم إيهيرب

تجربتي مع زيت بذر الورد:


ببساطة من الحاجات اللي أقدر أقول عليها فى مجال العناية بالبشرة أنه كنز ما أقدر استغنى عنه


أنا بس فى الصيف بقلل استخدام الزيوت لإنها بتبقى ثقيلة على بشرتي شوية بس ممكن استخدمه فى وسط أيام الأسبوع من مرة لاثنين.


و بما أننا داخلين على فصل الشتاء يبقى جميل جدا لما تضفوه للروتين بتاعكم و هتحسه بالفرق في النضارة وإن البشرة مشرقه و هتبقوا من محبينه زيي وأكثر

ودي تدوينة فيها نصايح مهمة يا بنات للعناية بالبشرة في فصل الشتاء علشان نتجنب جفاف البشرة (للاطلاع هنا) 

من تجربتي ليه بحس إنه وحد لون بشرتي جدااا و كان عندي أثار حبوب بسيطة فى جبيني راحت و بقى اللون واحد و حسيت أن بشرتى درجتها فتحت شوي و كمان بقت حالتها أحسن فى مقاومة الحبوب
يعنى الحبة مبقتش مستعصية زى زمان

لا بقت تتطلع و تختفي من غير ما تسيب أثر و بقعة وما تطول و ده طبعا جزء من الروتين كله
الروتين كامل و العناية كاملة بتفرق في صحة البشرة والكواليتي بتاعتها
سيرم زيت بذر الورد

لو ليكم أسئلة عنه تاني  راسلوني أو مين جرب زيت بذور الورد 

اللى جربه يقولنا حكمه و تجربته معاه
وحاليا بجربه من براند THE ORDINARY وحبيته ونتائجه جميلة وامتصاصه سريع ورائحته مش صعبة جدا اخف شوية 
دمتم جميلات ...

عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming