MermaidCharming MermaidCharming

آخر الأخبار

جاري التحميل ...

روتين و نصائح العناية بالبشرة في فصل الشتاء/ SKIN CARE ROUTINE IN WINTER

بسم الله الرحمن الرحيم
صباحكم جميل بنات صباح شتوي  دافيء
كيف الاحوال
 بما اننا دخلنا فصل الشتا خلاص  فحبيت اتكلم معاكم عن موضوع مهم هو إن المفروض الروتين بتاعنا في فصل الشتا بيبقى أعمق و ومركز أكتر علشان نتفادى الجفاف و تقشير البشرة(أتأخرت شوية  معلش كنت عاوزة انزل الموضوع ده بدري شوية).

كنت زمان مش مدركة الفرق و كنت دايما بعاني في الشتاء من أن بشرتي مقشرة  حولين الفم و الجبهة وكنت بستخدم نفس المرطبات اللي بستخدمها في الصيف مش بغيرفي ستايل  الروتين
بس حاليا الموضوع اتغير علشان كده حبيت نتكلم سوا في الموضوع ده
هقولكم على شوية نصايح و أيه التغيير اللي المفروض نضيفه على روتينا الشتوي.

اولا - نقطة مهمة عادة احنا مفكرين اننا بنستخدم الواقي من الشمس SUNSCREEN  في فصل الصيف فقط بس للأسف دي معتقد خاطىء عندنا المفروض نستخدمه صيف و شتاء علشان نحاظ على بشرتنا
حيث ان التعرض للشمس بيسبب معظم المشاكل زي الجفاف و التصبغات و شيخوخة البشرة حيث انه بيقلل من معدل الكولاجين في بشرتنا والمقصود بالشمس الأشعة  فوق البنفسجية و دي أشعةطويلة المدى  موجودة دايما و ليها قدرة انها تخترق الغلاف الجوي حتى في فصل الشتا و ليها آثرها السلبي على بشرتنا و الشيخوخة و ظهور التجاعيد
 لازم نستخدم الواقي من الشمس في الشتا حتى لو معدل الحماية أقل  SPF

ثانيا - نشرب ميا كتير صراحة انا بقولكم كده وأنا من اكتر الناس اللي بنسى فعلا أشرب ميا بشكل محترم.

ثالثا  - نتجنب غسل وشنا بالميا الساخنة لأنها بتسبب الجفاف و نتجنب الساونا

رابعا - نستخدم غسول مناسب و يفضل يكون كريمي لطيف بلاش الغسول الرغوة علشان بينشف البشرة و بيقلل جدا من زيوت البشرة اللي بنبقى محتاجينها بنسبة في الشتا و الأحسن نغسل وشنا بالغسول بأيدينا مش بفرش الغسول و كده علشان أيدينا أكيد ألطف و اخف على بشرتنا

خامسا - تقشير اسبوعي مثلا او كل اسبوعين  (بلاش كل يوم او مرتين في الأسبوع او الغسول اللي بالحبيبات) و نبعد عن التقشير الكيميائي

سادسا - الترطيب ثم الترطيب ثم الترطيب
هنا بقى ممكن نستخدم مرطبات مختلفة شوية يعني نميل اننا نستخدم مرطبات تقيلة زي مرطب بزبدة الشيا
زبدة الشيا مفيدة جدااا و كمان مناسبة لمعظم أنواع البشرة و غنية بمضادات الأكسدة.

ممكن كمان نعتمد على الزيوت الطبيعية الخفيفة زي زيت بذور العنب أتكلمنا عليه سوا هنا (للاطلاع اضغط هنا )

او اكتر زيت بحبه و بضيفه على المرطبات بتاعتي او مرطب الجسم او اللوشن
هو زيت اللوز الحلو و اتكلمنا عنه كتير هنا
نقطتين منه على اطراف الأصابع و نعمل مساج لبشرتنا بيه و هنزلكم قريب ماسكات جديدة وخلطات كمان بزيت اللوز(للإطلاع هنا )

وممكن كمان ندخل سيرم في الروتين بتاعنا زي سيرم أو زيت بذور الورد المعصور على البارد

من أحلى السيرم المخصصة للبشرة و عادة بستخدمه في فصل الشتا للعناية المركزة اكتر غير فوايده في النضارة و حيوية البشرة و معالجة التجاعيد و الحبوب (سيرم ساحر ) هكلمكم عنه بالتفصيل هنا (للاطلاع)


أخر حاجة اوقات بعملها في فصل الشتاء بستخدم زيت جوز الهند عند إزالة المكياج علشان تبقى بشرتي رطبة و فعلا مزيل مكياج جميل جدا

سابعا  - مننساش نرطب شفايفنا كويس جدا و نعملها أسكراب خفيف علشان نزيل الجلد الميت

أخيرا مننساش ترطيب جسمنا بمرطبات تقيلة مش اللوشن الخيف ممكن كريمات بالشيا هتبقى جميلة و فعالة جدا و ترطيبها عالي

خلصت يارب اكون ضيفتلكم حاجة جديدة
وتفرق معاكم
دمتم جميلات  

عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming