MermaidCharming MermaidCharming

آخر الأخبار

جاري التحميل ...

حب الشباب أسبابه وعلاجه /ACNE

حب الشباب أسبابه و علاجه

بسم الله الرحمن الرحيم
صباح/ مساء الدفء و الأمان 
كيف الأحوال

حبيت النهاردة اتكلم في حاجة تقريبا شريحة كبيرة مننا بيتعرضله في مراحل عمرية مختلفة و بأشكال كمان مختلفة موضوعنا النهاردة عن حب الشباب بنتين بعتوا سألوني عليها لو اعرف حل ليها 
فقولت نتكلم هنا أحسن علشان مساحة الكلام تبقى اكبر بينا و استفيض في الكلام معاكم براحتي 
 هنتكلم عن سبببه علاجه نحافظ على نفسنا ازاي ؟

هكلمكم عن تجربة من واقع التعامل مع دكاترة الجلدية و أيام الصيدلية و مرضى الجلدية وكمان عن تجربة شخصية كنت مريت بيها ايام الكلية و مريت بفترة الحبوب فيها كانت مأثرة على نفسيتي جدا   

اولا علشان نبقى واضحين سوا حالات حب الشباب بتبقى محتاج دكتور جلدية شاطر و بياخد وقت في العلاج فياريت نهتم وبلاش نسمع أي كلام وده و ناخد علاج صاحبتي كانت بتاخده او اختي أواخويا 

النهاردة انا مش هقدم استشارة طبية أنا بس هقولكم شوية عادات غلط ممكن تكون سبب في زيادته وهقولكم مثلا ماسكات طبيعية تساعدنا في العلاج بس مش هي العلاج علشان نبقى واضحين سوا من الأول 

اولا ممكن نلاقي شباب كتير في مرحلة المراهقة بتعاني من ظهور حب الشباب وممكن كمان نلاقي بعد التلاتين بيظهر حب الشباب 
                                           ____________________________________

من الأسباب المعتادة و المنتشرة في حالات  حب الشباب

- الهرمونات بتلعب دور كبير جدا في مشكلة ظهور حب الشباب  (إضافة إن البنات أوقات بتستخدم مكياج يحتوي على زيوت كتير)

- وكمان الغدد ممكن تسد المسام و ده اللي بيخليها تبدأ تظهر الحبوب 

- وكمان النظام الغذائي المتبع بيلعب عامل كبير جدا لأنه عادة بيبقى غني بالدهون أو المكسرات أولب و تسالي كتير و مملحات كتير  أو كميات كبيرة من الشيكولاتة.

- وكمان التوتر بيؤثر بشكل كبير وواضح و ده اللي بيعاني منه معظم اللي تجاوز الثلاثين 
التوتر بيكون سبب في ظهور الحبوب نتيجة زيادة الكورتيزول و هرمونات التوتر

- والبنات في فترة الحيض أو فترة الحمل بيتبقى عرضة اكتر لحب الشباب نتيجة التغييرات الهرمونية

- وممكن نتيجة إجهاد البشرة و جفافها و تشققها يدخلنا فى المشكلة دي 

- وممكن تكون حب الشباب عرض جانبي لعلاج و ادوية مثل أدوية المحتوية على الإستروجين والليثيوم والستيروتيدات والأندروجين ودي حلها انها مجرد ما بنوقف الأدوية بتتحل المشكلة

-كل دي عوامل مؤثرة نحاول نتجنبها علشان نساعد العلاج أن تاثيره يكون اكثر فعالية.
                                 ________________________________________

يلا نبدأ نقول شوية نصايح نأخد بالنا منها:

نغسل الأيدين قبل غسيل الوجه

نستخدم غسول لطيف على البشرة خالي من الزيوت ونغسل الأماكن المصابة بحب الشباب بلطف مرتين يوميا على الأقل (نغسل بأيدينا و نبعد عن  فرش تنظيف البشرة)

وياريت نستخدم منشفة (فوطة) خاصة للوجه و خاصة بينا لوحدنا

نبعد عن الأغذية المملحة و المكسرات  والشيكولاته  والمخللات ونلتزم بأغذية صحية أكثر

نتجنب لمس البشرة وأماكن الإصابة بإيدينا للحد من البكتيريا. (للأسف عارفة إنها حركة لاإرادية).

نرطب بشرتنا جيد جدا بعد الغسول و نتجنب التعرض للشمس علشان نبعد البشرة عن أي التهاب أو تهيج.

وطبعا للبنات لازم نزيل المكياج كويس جدا بعناية و نغسل و نعقم باستمرار أدوات المكياج و فرش المكياج بتاعتنا (لأنها من أسباب الشائعة في نشر حب الشباب)

                              ___________________________________

بس هقولكم طريقة قديمة جدا من وصفات الأجداد كده بس كنت بشوفها بتجيب نتيجة مع ناس فعلا
الوصفة سهلة و مش مكلفة هي باستخدام الخميرة وجابت معي في فترة من حياتي في فترة الاولى من الكلية
أولا الخميرة تعتبر من من المواد الغذائية عالية القيمة وتعتبر من اعظم الأكتشافات الغذائية
هي بتكون غنية بالأملاح والفيتامينات وبيها قدر كبير من البروتين والمواد المفيدة جدا و مغذية.

يلا نقول وصفتنا:
هنشتري خميرة قطع كمية كويسة (خميرة بيرة)

ونقطعها قطع صغيرة و ناخد قطعة من الخميرة و نبللها بالميا تبقى عجينة شوية وبعدها نضعها على الحبوب اللى محتاجين نعالجها
ونسيبها على مكان الحبوب لحد ما تنشف و بعدها نغسل بشرتنا جيدا بالماء الفاتر و نكمل الروتين العناية

وده طبعا بجانب العلاج و الأدوية بس الطريقة دي فعالة فعلا بتخخف من انتشار الحبوب و بتجففها و تقلل من التهاباها

وومكن كمان نعمل ماسك الخميرة
نضيف قطع خميرة مع فنجان لبن و معلقة من العسل و شوية ماء و نخلطهم جيدا نعمل بيهم قوام مناسب للماسك و نضع الماسك على بشرتنا مكان الحبوب لمدة 20 دقيقة و بعدها نشطف بشرتنا بالماء الدافىء و بعدها البارد
ممكن نكرره مرة اسبوعيا


هقولكم كمان ماسك جميل ومفيد للبشرة اللي بتعاني من الحبوب مش بس حب الشباب و الماسك ده شوفته من مدة عند البلوجر العالمية المعروفة فرح  farah dhukai تقريبا مفيش حاجة كانت ممكن تتعمل ماسك محطتهاش على بشرتها أو شعرها هتتبسطوا بمتاابعتها هي صاحبة براند فرسالي هي و زوجها وبيصنف من البراندز الفخمة جداوالتحفة جدا بنات.

هو ماسك الكركم
الكركم بصفة عامة مفيد جدا جدا بيخفف من التهابات و بينظف المسامات وكمان بيفتح لون البشرة بس الكركم اللي بنستخدمه في
الماسكات هو الكركم الطبي مش كركم الطعام

الماسك:
معلقة كبيرة من العسل
معلقة صغيرة كركم طبي
معلقتين لبن
معلقتين ميا ورد

طريقة الماسك:
نخلط اللبن و العسل جيدا و نضيف لهم الكركم و بعدها نضيف ماء االورد لحد ما يبقى قوام الماسك متماسك ونضعه
على بشرتنا لمدة 20 دقيقة وبعدها نغسل بشرتنا جي بالماء الفاتر و ممكن نمرر بقطنة بماء الورد بعدها

بس كده ماسك خفيف و مشهور كمان بفعاليته

 أخر ماسك أو وصفة هقولها النهاردة
ماسك القرفة و العسل:

معلقة صغيرة من القرفة

معلقة كبيرة من العسل (ممكن إضافة معلقة زبادي كمان)

نخلط المكونات سوا جيدا تكون عجينة و نضعها على بشرتنا 15-20 دقيقة ثم نغسل بالماء و نرطب بعدها جيدااا (ممكن نحس بشوية حرقان في بشرتنا عادي نتيجة القرفة بس الماسك ده جميل و بيفرق و كمان وجود العسل مناسب حتى للبشرات الحساسة)

خلصت كلامي معاكم يارب ينفعكم و يضيفلكم بس متنسوش متهملوش في بشرتكم و أرجعوا دايما للمختص بس خدوا بالأسباب و ابعدوا عن العوامل اللي بتاثر و تزودها من حيث الأكل او العوامل النفسية. وحتى لو طولت فترة العلاج بالألتزام و الطبيب الشاطر هتروح و تبقوا في احسن هيئة إن شاء الله.

دمتم جميلات بعافية













عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming