MermaidCharming MermaidCharming

آخر الأخبار

جاري التحميل ...

ما هي فوائد وأهمية سيرم فيتامين سي للبشرة | VITAMINE C SERUM

استخدامات سيرم فيتامين سي للبشرة

بسم الله الرحمن الرحيم


صباحكم / مساءكم رايق ومليان بالصحبة الحلوة

أتمنى تكونوا بتقرؤا التدوينة دي وأنتن في أحسن حال

تدوينة النهاردة عن واحد من السيرم اللي دخلتها في العناية بالبشرة بما أننا تجاوزنا ال 25 فبقى العناية أهم و أكثر شوية علشان منعجزش بدري بدري (بنحاول )


يمكن من بعد ال 25 بقيت بميل أكثر للسيرم في روتين العناية اليومي وده لأنه بيهمني أكثر إن المنتج يوصل للأنسجة الداخلية ميبقاش سطحي وبس وده اللي بيعمله السيرم إنه بيوصل للأنسجه الداخلية عكس الكريمات بتبقى موضعية.

فالاثنين مهمين وبيكملوا بعض.

النهاردة هنتكلم عن  فوائد وأهمية  سيرم فيتامين سي  للبشرة ونضارتها وعلاج التصبغات /VITAMINE C SERUM 


اتكلمنا قبل كده على سيرم هيالورنيك أسيد (للاطلاع اضغط هنا )  وفوائده و قد ايه مهم ندخله في روتينا.


جه الدور على تاني واحد في الروتين هو فيتامين سي

بعيدا عن اأن فيتامين سي مهم جدا لجسمنا في العادي وإنه بيزود من قوة الجهاز المناعي بالتالي في محاربة الأمراض وإن المفروض لينا جرعة يومية نحصل عليها منه
 وبيدخل في تكوين الكولاجين في جسمنا اللي بيدخل في كل الغضاريف والأربطة في جسمنا وهنلاقى ناس كثير بتأخد مكملات فيتامين سي / وكولاجين.

هنتكلم النهارده بالتحديد عن فوائد فيتامين سي لبشرتنا وأزاي ندخله في الروتين بتاعنا وايه أحسن الأنواع؟ 

يلا نبدأ

فوائد فيتامين سي للبشرة:

- فيتامين سي غني بمضادات الأكسدة وده طبعا بيساعدنا على حماية البشرة من التلف اللي كلنا بنتعرضله من ساعة ما بنخرج من البيت (الدخان - أشعة الشمس و غيره ...) وغني كمان بمضادات الاتهاب وبالتالي هيساعدنا نقلل من تحسس الجلد

وبينظم إفراز الدهون للبشرة ده و هيخليها تفرز دهون بشكل معتدل و يزود من رطوبتها و حالة الجلد تتحسن و بالتالي هنلاقيه مستوى الرطوبة فيه أحسن وزادت الليونة فيه يبقى كده هيحسن من حالة البشرة الجافة.

- هينظم الرطوبة و يقلل التهيج.


- فيتامين سي مقشر خفيف للبشرة فده هيخلينا نتخلص من الجلد الميت اللي بيخلي البشرة باهتة ومش صحية يبقى بالتالي هيزود من نضارة بشرتنا ويحسسنا بالشباب

(أساس إننا نحس إن بشرتنا شباب هو النضارة والترطيب)

- بيساعد على توحيد لون البشرة وتفتيح التصبغات والبقع (ممكن يساعد في علاج الكلف) و ممكن آثار الحبوب اللي سببتلنا بقع (ودى فعلا أنا فرقت معايا جدا آثار الحبوب كانت فى جبهتي وذقني كثير بالمواظبة خفت خالص أو شبه اختفت مع الروتين الكامل)


- قولنا قبل كده بيحفز تكوين الكولاجين  اللي بيقل مع التقدم فى السن ومهم جدا في تكوين الانسجة الداخلية لبشرتنا و بالتالي

هيساعدنا نحارب الشيخوخة وعلامات تقدم السن.
ومعدلات وجود فيتامين سي في الطبقات الخارجية أكثر من الطبقات الداخلية فتعرضنا الدائم لأشعة الشمس والتلف بيقلل من مخزون فيتامين سي.
علشان كده بنحتاج ندخله في الروتين بتاعنا ونعوض النقص مع التقدم في السن.

- بيساعدنا كمان فيتامين سي على تقليل الخطوط الرفيعة والعلامات التعبيرية اللي بتظهر على جانبي العين أو حوالين الفم.


طيب هنا سؤال مهم ممكن نسأله ؟

فوائد سيرم فيتامين سي في العناية بالبشرة


هل فيتامين سي مخصص لنوع معين للبشرة ولا عادي أي نوع بشرة  ؟


لا مناسب عادي لجميع انواع البشرة بس ممكن نلاقى ناس بشرتها دهنية واستخدامه زودلها من إفراز الدهون.


فهنا نستخدمه 2-3 مرات في الأسبوع


طيب والبشره الحساسة الجافة في الأول هنلاقيه مناسب جدا وضبط إفراز الدهون ورطوبة البشرة ومش هتحسس ولا حاجة بس فيه ناس مع تغيير الفصول نوع بشرتها بيتغير أو بتجف أكثر.


ساعتها هنستخدمه مرتين في الاسبوع مع الروتين العادي بتاعنا


طيب سؤال تاني ؟


هل لازم استخدم فيتامين سي مع منتجات معينة أو بشكل معين (استخدامه الصحيح ) ؟


فيتامين سي مش بتقل فعاليته لو استخدمته بشكل مش صحيح لا عادى هيدى نفس النتيجة يعنى محدش يقولى استخدمه مع منتج ايه بالظبط


لا عادي استخدمه مع روتينك عادي خالص


بس طبعا لو فيه تفضيلات

 يبقى يفضل إن الغسول بتاعنا يكون حمضيته قليلة علشان منتعبش بشرتنا ونستخدمه بعدها (زى غسول ألفا أو بيتا هيدروكسي أو الغسولات منخفضة الحموضة بس ده يفضل في العناية بالبشرة مشمع فيتامين سى بصورة خاصة لا ده الأفضل بشطل عام )

عادي بعد أي غسول.


يفضل نحطه بليل قبل ما ننام و نسيبه وننام علشان نقلل من تعرضه للضوء ونحصل منه على أعلى استفادة بس كثير من الانواع حاليا مكتوب في التعليمات الخاصة بالاستخدام أنه يستخدم مرتين صباحا ومساءا

وكثير من الكلام الحديث أنه ممكن التعرض بيه للضوء.

فيه انواع من فيتامين سى بيبقى مضاف إليها هيالورنيك أسيد أو ببتيدات أو الوفيرا

وده بيزود من قيمته و فوائده للبشرة


 كالعادة زي ما بنقلكم دايما تجاربي الشخصية مع الجانب العلمي:


فأنا أول مره أجرب فيتامين سي كان فيتامين سي من THE BODY SHOP و للأسف مناسبنيش سببلي جفاف شديد و نشف بشرتي جامد.

بس قررت أجرب نوع تاني جربت OBAGI وجربت OZ NATUTAL وجربت REXOL و جربت RADHA BEAUTY طبعا اختلافات الأسعار بينهم كبيرة

بس محستش فروقات كبيرة تذكر يعنى بس أقلهم فى وجهة نظري كان RADHA BEAUTY  مكنتش حاسة نتائج و أحسنهم  كان OBAGI (وجهة نظري واستخدامي).


اللي في الصورة ده من ADVANCED CLINIC حصلته من IHERB كان فى عرض


وحبيته
بيدى نضارة و بشرة رائقة ومسسبليش أي جفاف أول مرة استخدمه حسيت حرقان خفيف وبعد كده من تاني أو ثالث استخدام بقى عادي خالص ويصلح كمان السيرم ده يكون استخدام يومي ومحستش فروقات كبيرة عن أغلى السيرم من فيتامين سي.
وحاليا بستخدم سيرم فيتامين سي من براند THE ORDINARY بس لسه تحت التجربة. TIP سريعة كده / ملحوظة 

الأحسن علشان نحافظ على فيتامين سي إننا بعد ما نفتحه نحتفظ بيه في الثلاجة علشان ميتأثرش بالحرارة والضوء و يتأكسد ويفقد فعاليته


لون فيتامين سي الصحيح

لونه إصفر فاتح خالص كل ما يغمق ده معناه إنه متأكسد للأسف و هيبقى معدوم الفائدة وممكن يسبب نتائج مش حلوة لبشرتنا و مشاكل.
لون سيرم فيتامين سي الصحيح

 طيب اخر حاجة هقولها زي ما قولنا فوق سوا السيرم بيهتم بالأنسجة الداخلية لبشرتنا

يبقى محتاجين حاجة لبشرتنا من الخارج.
فبعد ما بستخدم السيرم بستخدم مرطب لبشرتي المناسب ليها مش بنكتفي بالسيرم و بس

وإن شاء الله ناوية أكلمكم عن الديرما رولر و استخدام سيروم فيتامين سي بعدها 


و ممكن كمان أقولكم طريقه نعمل بيها سيرم فيتامين سي فى البيت 

شكلنا هنعمل سلسلة عن فيتامين سى ...

كده خلصت كلامي

عارفه إني طولت عليكم بس بحب أنقلكم التجربة كاملة بأمانة

  دمتم جميلات ....

عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming