MermaidCharming MermaidCharming

آخر الأخبار

جاري التحميل ...

تحديد درجة أندرتون البشرة واختيار الألوان الصحيحة؟ | UNDERTONE TEST AND HOW TO CHOOSE CORRECT SHADES



بسم الله الرحمن الرحيم 

عاملين ايه يا جميلات 
صباحكم / مساءكم جميل بلون قلوبكم 

جالي سؤال من بنوتة ومبسوطة أوي إنها سألتنا ويارب تستفيد بالإجابة
السؤال: أنا بيضاء وبجيب لون الفونديشن فاتح بس بلاقيه يقلب معايا على رمادي و غيرت أكثر من نوع فاونديشن والمشكلة بتتكرر 

فهنا حضرت فكرة إننا نتكلم سوا عن إزاي نختار لون الفونديشن الصح وميبقاش فيه معاناة إنه باهت أو مجير أو لونه رمادي !! 
يلا نبدأ نتكلم سوا عن الأساس اللي نختار بناء عليه البلاشر الفونديشن الروجات أو حتى ألوان اللبس كمان

الأساس بتاعنا هو: الأندرتون
يعني إيه أندرتون ده اللي هنعرفه حالًا

اولا كلنا عندنا حاجتين :

TONE  -  1/اللون الخارجي
 و ده اللي كنا على أساسه بنختار لون الفونديشن بس للاسف ده غلط لإن اللون الخارجي  ده بيتغير من كل العوامل الخارجية 
هنلاقي البيضاء و السمراء و الحنطية. 

UNDERTONE  -  2 اللون الداخلى و ده اللي المفروض نراعيه في المقام الأول كلنا هو ده الأساس بتاعنا

اللي بيساعدنا كلنا نحدد على أساسه لون البلاشر والفونديشن والمكياج كله واللبس كمان. 

وهنا يأتي الاختلاف 
يعنى ممكن يبقى فيه اكتر من بنت كلهم لونهم أبيض فاتح  TONE / اللون الخارجى بس مختلفين في الأندرتون  UNDERTONE بتاعهم و بالتالي مش كلهم ينفع معاها نفس درجة الفونديشن.

طيب نحدده إزاي الأندرتون الصح بتاعنا و فيه كام نوع 
دى النقطه اللي هنتكلم فيها حالا 

نحدد الأندرتون بطريقة سهلة جدا ومنغير مجهود نجىء في إضاءة قوية أو في الشمس ونبص على العروق اللي موجودة في الرسغ او العروق اللي في إيدك 
لو مش باينة ضمي إيدك جامد وهتبرز العروق وتشوفي درجتها كويس هنلاحظ 3 أنواع 
WARM UNDERTONE /دافىء
حاولت أقرب/ZOOM IN  الصورة وأغمقها وأبين لون عروقي المخضر.

لو العروق لونها أخضر هيبقى الأندرتون (دافىء/WARM )
لو العروق لونها أزرق أو بنفسجي يبقى الأندرتون (بارد /COOL )
لو لونها بين اللونين يعنى مثلا أزرق محضر كده تبقى (محايد / طبيعى NEUTRAL)

وده يفرق معاانا فى ايه ؟
يفرق إن مش كل البنات البيضاء الأندرتون بتاعهم بارد ولا كل البنات السمراء الأندرتون بتاعهم دافىء 
ممكن تبقى بنت بيضاء والأندرتون بتاعها دافىء.
وزي ما قولنا الأندرتون ده الأساس اللي هنختار بناء عليه كل حاجة 

طيب نختار ألوان الفونديشن إزاي؟ 

لو الأندرتون بتاعنا دافىء يبقى نختار الفونديشن المائل على الأصفر. 
لو الأندرتون بتاعنا بارد نختار الفونديشن المائل على بينك. 
لو الأندرتون بتاعنا طبيعي ممكن نخلط الاتنين سوا هنوصل لدرجة مثالية. 

هتلاقوا في الصور دي كل أندرتون الألوان المناسبة معاه وألوان الروج ومكياج العيون المناسب لكل لون عين.




 والفونديشن برضه زى بشرتنا ليه أندرتون  هتلاقى مثلا MAC و ESTEE LAUDER و L'OREAL 

مكتوب على درجات الفونديشن جنب رقم الدرجة

W معناها دافىء   

 C  معناها بارد                         
N معناها محايد 
او فيه 
NW ده دافىء مجايد 
NC ده بارد محايد 
و اخر اتنين بيبقوا مناسبين اوى للبنات اللى مش بتعرف تحدد درجتها بسهولة
علشان كده أنا مثلا لو الأندرتون بتاعي دافىء واختار فونديشن على بينك لازم يقلب معايا على رمادي و شكلي يبقى مش حلو 

وعادة يا بنات كمان ياريت لما نختار درجة الفونديشن نختار درجتنا بالظبط بلاش أفتح مننا درجتين وثلاثة. 
لو فونديشن بيأكسد ممكن اختار درجة أفتح في الحالة دي

الفونديشن ده BASE بوحد بيه لون البشرة مش بغيرها وده علشان يبقى شكلنا طبيعي اكثر وميغيرش اللون على بشرتنا.

ولما نيجى نجربه ياريت منجربش الفونديشن واحنا بنشترى على ايدينا ده غلط 
نجرب على رقبتنا أو بين الرقية والذقن زي الصورة كده

علشان لون أيدينا حاجة ولون بشرتنا حاجه تانية 
و نشوف دمجه كويس معانا ولا لا.


وهنا هتلاقوا الماركة العالمية لورا مرسييه LAURA MERCIER حاطة ألوان الروجات اللي بتليق مع كل أندرتون



وأخيرا زي ما قولنا الأندرتون ده الأساس هتلاقوا في الصورة دي ايه أحسن ألوان تليق مع كل درجة 
الناس الدافئ تلبس ايه والبارد ايه وأصحاب الأندرتون البارد يلبسوا ايه حتى لون الأكسسورات المناسب أكثر الفضي ولا الذهبي؟!


بس خلصنا موضوع النهاردة 
يارب يكون ضافلكم جديد واستفادتم 

  دمتم جميلات 



عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming