MermaidCharming MermaidCharming

آخر الأخبار

جاري التحميل ...

طريقة عمل معجنات بالجبنة هشة / CHEESE PASTRIES RECIPE

بسم الله الرحمن الرحيم
يا صباح الخير و الرواق و الرزق الواسع
كيف الاحوال
خلاص بما اننا عرفنا بعض فأكيد عرفتوا إني من محبي الكيك و المعجنات و الكرواسون  وعملناه قبل كده بطريقة سهلة وكان هش (للإطلاع هنا)
والروايح الجميلة دي في البيت بتدي دفء للبيت وبركة و بتدي روح للفطار لما نعملها
النهارده هنعمل سوا معجنات للفطار سهلة جدا العجينة بتاعتها و بعتمد عليها دايما و ناجحة و هشة جدا جداا قطنية زي ما بيتقال عليها وهنعمل تشكيلات للعجينة بالصور سهلة خالص بدائية كده بس تغيير.
يلا نبدأ سوا نقول المقادير بتاعتنا المظبوطة
وكل واحد فينا يظبط المقادير حسب اللي عنده براحته


المقادير:
المقادير كلها بالكوب المعياري
7 اكواب دقيق
معلقتين كبار خميرة
معلقتين كبار لبن بودرة
معلقتين كبار سكر
معلقة صغيرة ملح
3أكواب تقريبا ماء دافىء يضاف تدريجيا و يختلف على حسب احتياج العجين
نص كوب زيت او اقل شوية
قطعتين كبار زبدة
معلقتين كبار زبادي
الأساس : الدقيق - الخميرة -السكر - الملح - الزيت-الماء
أي إضافات مننا تاني علشان نزود هشاشة و طريان العجينة

الطريقة:
في بولة صغيرة (كوب الكاء الدافىء و نضيف معلقتين السكر و ندوب فبهم معلقتين الخميرة) ونتركهم حوالي 10 دقايق علشان نتاكد من جودة الخميرة أنها تخمر
وممكن نبدل كوب الماء بكوب لبن دافىء أحلى و أحلى.

في بولة العجن
نضيف الدقيق وعليه معلقة الملح و معلقتين اللبن البودر و نخلطهم جيدا
ونيف الزبادي و بعدها الزيت و نخلط المكونات سوا
وبعدها ننزل عليهم الخميرة الجاهزة معانا من  الخطوة الأولى
ونبدأ العجن و نضيف الماء تدريجي على حسب احتياج العجين
وبعدها نضيف الزبدة (في درجة حرارة الغرفة) و نكمل العجن
محتاجة مننا  مش أقل من 10 دقايق لربه ساعة عجن جيد جداااا لحد ما نوصل لعجين طري
أو نستخدم الFOOD PROCESSOR أسهل و انجز(بنستخدم فيه الخطاف)

نترك العجين ليختمر في مكان دافىء و هيتضاعف حجمه و بس كده و بعدها نبدأ التشكيل
والحشوات زي ما نحب أجبان - سوسيس/نفانق.......إالخ

صور التشكيلات هنعلمها سوا زي الصور سهلة
دي للسوسيس او النقانق
نعلمها شريط رفيع و نحط السوسيس على أوله و نلفها عليه و نخلي الطرفين في الصنية لتحت عند التسوية في الفرن علشان ميفكش


الشكل ده عادي خالص
هناخد قطعة من العجبن و نفردها دائرة 


و نحط الحشوة بتاعتنا في النص و نقفلها على الحشوة زي الصور و نفردها دائرة بإيدينا تاني كده 




و بالمقص نقص الأطراف ونسيب الجزء اللي في نص الدائرة زي الصور كده (الحشوة دي لبنة حارة)



الشكل ده بحبه جدااا
نأخد قطعة من العجين و نفردها مستطيل و بعدها نفرد الحشوة بتاعتنا عليها كلها 


و نبدا بقى نلفها على بعض بالراحة كده


وبعدين بالسكين نقسمها طرفين زي الصورة بس نسيب أول العجين من غير ما نقسمه علشان نعرف نلف عليه (واضحة في الصورة)


ونلف الطرفين على بعض كده زي الضفيرة وبعدها ممكن نقطع الطرف الصغير اللي كنا سيبينه و نلفه


وكده بقى عندنا ضفيرة طويلة نضم الطرفين على بعض دائرة كده و نقفلهم سوا جيدا
سهلة جدا و جميل الشكل جدا (يارب أكون وضحته)


اخر شكل النهاردة لطيف خالص
ناخد قطعة من العجين و نفردها مستطيل و الحشوة بتاعتنا نحطها في النص فقط و بعدها نعمل قطعات  شرايط تقريبا عدد متساوي على الطرفين



ونبدا نقفلها تبادلي شريط يمين باتجاه الحشوة و بعدها الشريط الشمال ونفضل كده واحدة واحدة لغاية ما نخلصها
سهل خالص و جميل (يارب الصورة تكون موضحاه)


بس خلصنا موضوع فطار اليوم
بالهنا على قلوبكم
دمتم طيبين..



































عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming