MermaidCharming MermaidCharming

آخر الأخبار

جاري التحميل ...

إزالة شعر الوجه بالأمواس (شيفنج الوجه) | HOW TO SHAVE MY FACE BY FACIAL RAZOR

أمواس الوجه


بسم الله الرحمن الرحيم
هلا وغلا

هنتكلم سوا النهاردة عن أحسن وسيلة لإزالة شعر الوجه من وجهة نظري و هي ال facial razor الشفرة الموس الواحد أوfeather 
عادة كلمة الموس أو الشفرة اول ما بنسمعها بنفكر إنها حلاقة زي حلاقة الرجال بس الموضوع مختلف لأن الشفرات نفسها مختلفة ومقصوصة بالليزر بشكل معين يناسب بشرتنا إحنا البنات لإن بشرتنا تختلف عن بشرة الرجال.


أنا هتكلم من واقع تجربتي الشخصية مع إزالة شعر الوجه بالموس ؟

الشفرات دي أنسب طريقة و أنجح طريقة معايا و بدأت تلاقي رواج كبير بين البنات حاليا.
أنا متعودة عليها من فترة ليست قصيرة خالص كنت دايما بشوف اليوتوبرز الأجانب دايما بيستخدموها و عليها مدح كبير 
و جربتها و نجحت فعلا (أولا انا من الناس اللي بشرتها بتتحسس بسرعة جدا ) فطريقة الواكس دى صعبة جدااا و بتسببلي تسلخات في الجلد و التهابات شديدة و منصحش بيها أبدا لأنها قاسية على بشرة الوجه بما أنها رقيقة و كمان لو حد بشرته حساسة فيبعد أحسن عنها.

حتى الفتلة برضه هى فعلا أخف من الواكس بس كانت بتسببلي احمرار و حبوب في بشرتي و كنت مكملة عليها لغاية ما جربت الشفرات فاستغنيت عنها هي كمان إلا في منطقة أعلى الشفايف  (الشنب).

ملحوظة يا بنات الليزر مش بيشيل كل شعر الوجه الليزر مش بيشيل الشعر الوبري (الزعب ) الليزر بس بيشيل الشعر السميك ممكن اللى أعلى الشفايف أو الدقن أما الشعر الخفيف الليزر مش بيشيله و فيه للأسف عيادات كتير بتستغل البنات و يزودوا فى الجلسات ومش بيوصلوا للنتيجة اللي بيبقوا متخيلنها.

واتكلمنا سوا قبل كده عن إزالة شعر الجسم و شفرات فينوس بريز (للاطلاع اضعط هنا )

طيب أيه مميزات الشفرة/الموس و أيه عيوبها و أيه الطريقة الصحيحة للاستخدام !!


هنبدأ الأول

ما هي مميزات وإيجابيات شيفينج الوجه؟

- سهلة.
- سريعة.
- منجزة و غير مؤلمة. 
- لا تسبب التهابات للبشرة (ايدينا بتكون خفيفة و هنقول الطريقة بالظبط).

و طبعا زى أي إزالة للشعر لما بنزيل شعر الوجه بنلاقي لون بشرتنا بيفتح درجة أو اثنين.

- ممكن لو عندنا مناسبة و محتاجين وشنا فى الميكب ناعم و smooth كده بنعملها قبل الميكب بيخلي الفاونديشن أحلى و ما بيقطع ولا بيتكتل حوالين الشعر و شكله يبقى مش حلو بيعطينا  FLAWLESS LOOK .

- تقشير البشرة يزيل طبقة الجلد الميتة الخفيفة (بس مش تقشير كيميائي يعني فيه اختلاف طبعا).  

مناسبة لمعظم البشرات حتى الحساسة (الحلاقة على الناشف للبشرة العادية أما لو بشرة بتحسسس جدا ممكن تحلق على الرطب أو تحط كريم مرطب الأول و بعدين تبدأ تحلق بيسهل ومش بيسبب أي تهيج أو حبوب) بس أنصح الأول تجربتها على مكان صغير ونشوف رد فعل بشرتنا عليها 

بس منصحش بيها لو بنت عندها حب شباب في بشرتها ممكن تلتهب أكثر.


شيفنج الوجه

ما هي عيوب وسلبيات شيفنج الوجه؟


- الشعر بينمو بسرعة مش طبعا زى الفتلة أو الواكس.

هى مش عيوب قد ما فكرة إنها ممكن متناسبش مجموعة من البنات  يعنى البنات اللى شعر الوجه عندها سميك أو أسود غامق مش هيبقى مناسب ليها للأسف.

لأن الأمواس بتشيل الشعرة من السطح مش من الجذور فهيبقى شكلها مش حلو في الحالات دي (الشعر السميك و الغامق ده مناسب جدا الليزر أو الفتله وكده إنما الشفرات مناسبة جدااااا لأصحاب الشعر العادي أو الخفيف و اللي لونه فاتح )

وفيه بنات ممكن تشتكي إنها تحسست منها وده مش الطبيعي.

(ده عادة بيبقى هي عملت حاجة خطأ ومشالتش الشعر بالطريقة الصح أو كشطت الجلد بشكل زيادة) 

الطريقة الصحيحة لإزالة شعر الوجه بالأمواس ؟

- عادة استخدم شفرات الوجه مخصوص وبتكون  الشفرة بتاعتها المشرشة بتشيل أحسن و كمان مش بتحك الجلد.

- والشفرات يكون ليها غطاء علشان احافظ عليها من البكتيريا  و بتكمل الشفرة من 3-5 مرات استخدام و بعد كده هتلاقي الشفرة بردت  وما عادتش بتشيل الشعر زي الأول وممكن تستمر أكثر من 5 مرات.

- بستخدم كحول بخاخ من الصيدلية. 

- بستخدم مرطب قوى خالى من العطور.


-  أولا بغسل وشي بغسول كويس. 
-  و اسيبه ينشف لوحده (لو حد بشرته حساسة ممكن يبدأ و وشه رطب بالماء خفيف).
-  برش كحول على الشفرة قبل البدء.
-  وابدأ استخدم الشفره بزاوية 45 درجة (زاوية مائلة مش قائمة على الوجه) في اتجاه نمو الشعر مش عكسه. 
-  ببدأ استعمل الشفرة بإيد و الإيد الثانية بشد بيها الجلد كويس.
-  ممنوع الإعادة على المكان كتير وبلاش تفضلي طالعة نازلة بالشفرة (هى مرة أو مرتين فى إتجاه نمو الشعر). 
-  و بعدين بطهر الشفرة واقفلها بالغطاء بتاعها. 
-  ورطبِ بشرتك كويس جدا بعدها.  

بس كده 

هقولكم آخر حاجة 

أول حاجة بتيجي في دماغكم عن الشفرات إنها بتقل الشعر بعد ما بنستعملها!!


أكثر سؤال بيتردد هل إزالة شعر الوجه بالأمواس يزيد من كثافةالشعر وسمكه؟

إجابة واضحة لا الفكرة دي مغلوطة خالص ملهاش أي علاقة خالص إنها تزود الشعر (اللى شعره خفيف هيفضل خفيف و اللي شعره تقيل هيفضل تقيل)

عدد بويصلات الشعر في البشرة ثابت استخدام

- الشعر مش بيطلع سميك ولا حاجة ولا شبه ذقن الرجال ولا حاجه خالص كل ده كلام غلط عنها. 

كل ده كلام مغلوط  وخزعبلات أو استخدام خاطىء للشفرات. 

فيه عادة  شفرات مخصوص  للوجه بتبقى مشرشه و عريضة شوية. 

- فيه نوع تاني مناسب للحاجب و الأماكن الدقيقة بيبقى (الشفرة فلات /ممسوحة) و دقيقة كده مش عريضة.


حلاقة شعر الوجه بالشفرات(الأمواس)

أحسن أنواع أمواس الوجه 

 شفرات ألمانى أسمها EBELIN
شفرات اسمها فلامنجو | أمواس فلامنجو feather flamingo 
شفرات سيفورا SEPHORA Level Setter Razors
و لو مش موجودين بجيب من DASIO  RAZORS 
موجودين في الصيدليات الكبيرة أو أونلاين أو في محلات دايسو النوع الخاصة بيهم.

وكمان من كثر الرواج الكبير للشفرات والأمواس هتلاقوا HUDA KATTAN صاحبة واحدة من أكبر البرندات العالمية وهي HUDA BEAUTY عملت فيديو على حسابها على الانستغرام بتوضح أزاي بتستخدمها في إزالة الشعر والشيفينج وبتوضح مميزاتها ممكن تبحثوا هتلاقوا الفيديو شرحه سهل وبسيط.

خلصنا دردشة النهاردة 
يارب تكون مفيدة و جاوبت على كل الحاجات اللى بتيجي في دماغكم 
                                   دمتم جميلات ....

عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming