 |
| كيك التفاح |
بسم الله الرحمن الرحيم
صباحكم/مساءكم حلو زي موضوعنا النهاردة
كيفكم يا بنات . أتمنى تراسلوني أكتر و نتناقش اكتر و أكتر و تتفاعلوا اكتر من كده.
النهاردة موضوعنا عن وصفة كيك لذيذة جدااا و شهية لأبعد حد
طريقة عمل كيك التفاح /APPLE CAKE
اكلتها عند جارتى مغربية و كنت أول مرة أدوقها أنا عادة بحب ال APPLE PIE/ فطيرة التفاح بس دي كانت أول مرة آكل كيك التفاح و طلبت الوصفة منها و بقيت بعملها كتير
جميلة فى الفطار جدا أو أوقات بستغلها لما يبقى عندى تفاح زيادة وعاوزه أخلص منه :)يلا بينا أتكلمنا كتير و نسبنا الوصفة لصاحبتها يلا نقول بقى
المكونات:
3 بيضات في درجة حرارة الغرفة
كوب سكر أو اقل شوية (على حسب مزاجكم )
معلقة فانيليا صغيرة
بشر ليمونة
120 زبدة سايحة
من ربع لنص كوب لبن
2كوب دقيق منخول
معلقه كبيرة بيكنج بودر
رشة ملح
تفاح متقشر
قرفة
زبيب / لوز أو جوز (أختياري)
الأول هنضرب البيض والسكر و معلقة الفانيليا كويس جدااا لحد ما نلاقي القوام بقى لونه فاتح ونتأكد إن السكر داب كويس
بعدها نضيف بشر الليمونة والزبدة (علشان لو حد فكر أنه يبدل الزبدة بالزيت سألت صاحبة الوصفة و قالتلي بلاش لأنها مش بتطلع بنفس الطعم أحلى شىء الزبدة بتعطي طعم غني و شهي وخفيف)
و نضيف اللبن و نضرب كله سوا ضرب جيد
فى بولة هنضيف كل المقادير النواشف سوا الدقيق المنخول عليه معلقه البيكنج بودر ورشة الملح
و ننزل بالخليط السائل واحدة واحدة و نبدأ نخلطهم سوا لحد ما نوصل لقوام الكيك المثالي.
 |
| كيك التفاح MERMAIDCHARMING |
على جنب نحضر الحشوة:
نبدأ نقطع التفاح قطع صغيرة و نرش عليه قرفة وسكر بني و شوية زبيب و شوية لوز أو جوز
في القالب بتاع الكيك نبطنه كويس بشوية زيت ورشة دقيق و ننزل بنص خليط الكيك و بعدها ننزل بالحشوة بتاعتنا و بعدها نضيف باقى الخليط (النص التاني)
نفس فكرة السينامون كيك اللى عملناها التحفففة سوا قبل كده( للاطلاع اضغط هنا )
و الشكل من فوق بتاعنا بقى ممكن نضيف شرائح تفاح وعليها رشة قرفة وعليه رشة زبيب و شويه لوز أو جوز مبشور هيخلي الطعم أغنى جداااا
ممكن تكتفوا بإن حشوة التفاح في نصف الكيك بس ومنحطش فوق بس أنا بحب أضيف فوق كمان بحب التفاح جدا و الطعم بيبقى ميتحكيش صراحة بنات
خلاص كده سهلة جدا ومفهاش اختلافات كتير عن الكيك العادي
و على فرن ساخن مسبقااااا على درجة حرارة 180 و بتأخذ حوالى 40دقيقة أو على حسب الفرن بتاعكم
و دقيقة - دقيقتين نفتح الشواية علشان لون الوش بتاع الكيك.
بس كده خلاص و التقديم بتاعكم
انا برش علي الوش عند التقديم سكر بودرة
بس خلاص
وبالهنا و الشفا
دمتم جميلات...
 |
| كيك التفاح |