مسقعه باذنجان مشوى صحى /low fat moussaka recipe
اهلا اهلا يا حلوات
عاملين ايه النهارده
عساكم فى احسن احوالكم يارب
النهارده موضوع صغنن و خفيف هنقول وصفه سهله خالص للدايت / اكل صحى مش لازم حتى يكون حد بيتبع حميه
بما اننا بنحب المسقعه جدااا جدا بس المشكله انها كلها مقلى فى مقلى و بتبقى فيها كميه زيوت تجيب حرقان (بس بنحبها جدااا جدااا)
هنعملها بشكل صحى و هتبقى برضه طعمها جميل جدا ووجبه متكامله وكمان مناسبه للناس اللى بتعانى من الارتجاع و عندها مشكله مع المقليات كتير
الباذنجان من الخضار اللى بيعتمدوه كتير جدا فى الانظمه الصحيه لان سعراته قليله و غنى بالالياف مشبع علشان كده هنحاول نحافظ على طعمه الحلو المعتاد فى المسقعه بس من غير ما يبقى سعراته كتير
المقادير
3 حبات باذنجان
راس توم مفرومه ناعم
صلصه طماطم
فلفل حراق
فلفل كبى
بصله مقطعه شرايح
معلقه خل
لحم مفروم معصج (اختيارى )
بهارات (ملح - فلفل اسمر - شطه -بهارات مشكله )
الطريقه :
- هنقطع الباذنجان شرايح وسط (مش سميكه اوى ) و نحط شرايح الباذنجان فى بوله فيها ماء بالملح لمده نص ساعه
وبعد كده نصفيها كويس جدااا و ممكن ننشفها بمناديل وبعدين على طاسه او جريل ممسوحه بنقطه زيت و نبدا نشوى الباذنجان ياخد لون كده و يطرى شويه
و بس خلاص هيكمل سواه فى الفرن
- فى حله صغيره معقلتين زيت و نشوح فيها التوم المفروم لما يبدا ريحه التوم تطلع و لونه يبقى دهبى ننزل عليه بعصير الطماطم بتاعنا و ممكن نضيف عليه الفلفل الاخضر الحراق و نضيف معلقه الخل و بهارتنا اللى بنحبها و نسيبها على النار
( لنص ساعه ) تبقى الصلصه مش تقيله اوى بس خلاص
- وطبعا عندنا اللحمه المفروم معصجه من غير دهون بنعتمد انها بتستوى بدهون اللحم نفسه
- ممكن نضيف ليه بطاطس (اختبارى ) تبقى بطاطسايه مسلوقه فى 5 دقايق فى الميا و نقطعها مربعات او صوابع و هتكمل سواها مع الباذنجان فى الفرن
- نبدا نرص الطاجن بتاعنا نحط شويه صلصله الاول و بعدين نبدا نحط فوقه الباذنجان المشوى و بعدين شويه صلصه و نرص شويه من شرايح الباذنجان و شويه من الفلفل الكبى المقطع شرايح و ممكن لو فيه بطاطس نحط برضه نص الكميه
- وبعدين نحط اللحمه العصاج بتاعتنا و شويه صلصه فوقها
- وبعدين نكرر تانى اللى عملناه نرص باقى الباذنجان المشوى و فوقه البصل الشرايح و الفلفل الكبى و نضيف باقى الصلصه بتاعتنا
- و بس كده نغطى القارب بتاعنا بورق فويل و على فرن متسخن
ممكن تقعد فى الفرن حوالى نص ساعه و نبدا شم ريحه مسقعه تجنن و نفتح بعد كده الشوايه لو عاوزين الوش بتاعها ناشف وتاخد لون حلو كده
و خلصنا
ممكن تقدم مع ارز مسلوق كوجبه صحيه غداء متكامل ( بروتين - كارب - الياف 9 وممكن شويه سلطه كمان جنبهم و ممكن شوربه
حاجات كتير كل واحد ياكلها بالطريقه اللى بيحبها و كده
حلينا مشكله اننا بنحب المسقعه اوووى بس متنفعش فى الدايت
بالعكس ده الباذنجان من اساسيات الدايت
واوعدكم طعمها خفيف و لذيذ جدااااا
بس كده خلصنا
دمتم جميلات ...
بس كده خلصنا
دمتم جميلات ...