MermaidCharming MermaidCharming

آخر الأخبار

جاري التحميل ...

كيف أتعرف على نوع بشرتي ؟ How to know my skin type

كيفية التعرف على نوع بشرتي


بسم الله الرحمن الرحيم
صباح /مساء الحب عليكم بنات
كيف حالكم

النهاردة الموضوع اللي هنتكلم فيه بناء على سوال بنوتة أنا مبسوطة أنها سألتني ووثقت إنها ممكن تلاقي عندي إجابة ليها
 و هو ازاى أحدد نوع بشرتي ؟!!

كنت متخيلة أنه موضوع بسيط وإن كل واحد عارف بشرته نوعها ايه 
بس اكتشفت أننا أوقات بنمشي ورا كلام بعض وخلاص من غير حتى شوية بحث.

سؤال اتبعتلي من بنوتة  جميلة عندها 18 سنة بتقولي كل ما استخدم منتجات عناية بالبشرة يطلعلي حبوب /بثور و مش عارفة استخدم ايه و بفكر ما استخدمش حاجة كده صح ؟!!
سألتها ببساطة بشرتك نوعها ايه ؟
الرد بقى اللي فاجئني جدا : لا معرفش نوعها ايه ؟
قولتلها : أومال بتستخدمي على أساس  ايه طيب
قالتلى على أساس كلام صحابي ايه الحلو واللي جاب نتيجة معاهم !!
وده اللي خلاني اتكلم على موضعنا النهاردة.

ياريت يا بنات منختارش المنتج اللي هنستخدمه لبشرتنا بناء على صاحبتي قالت حلو

أول سؤال اساليها انتي بشرتك نوعها ايه؟ وشوفي بقى نفس البشرة ولا لا مش دايما اللى يناسب حد غيري يناسبني ولا اللى بيناسبني يناسب غيري.
وعادة المفروض إن الطبيب هو اللي بيحدد نوع بشرتك ويقولك ايه المناسب (وده اللي بنصح بيه دائما)
بس بما إننا حاليا في وقت السرعة والنت أسهل وسيلة لنشر المعلومة سواء الصح أو الغلط فتحروا الدقة يا بنات ياررريت 
ومتسمعوش من أي حد ولأن عادة كثير مننا مش بيبقى عنده وقت يروح لطبيب أو يستنى كشف او مش دائما أسعار الأطباء في المتناول.


فالنهارده هنتكلم سوا على أزاي أحدد نوع بشرتى ؟
وان شاء الله في المرات اللي جاية نمسك نوع نوع و نقول ايه العناية والروتين المناسب ليه

معلش اتكلمت كثير بس كان لازم انبهكم يا جميلات يلا بينا

ما هي أنواع البشرة؟
هما 5 أنواع:
-عادية 
- مختلطة 
- دهنية 
- جافة 
- حساسة
أنواع البشرة المختلفة

طيب أعرف أنا أي نوع بشرة أزاي؟

هقولك على طريقة سهلة جدا جدا و شوية ملاحظات تعرفي بيها الفرق
ممكن تركزوا مع الصوره اللي مصورهالكم (عبارة عن ملخص سهل وسريع وواضح  كتبته ) 
جاوبِ على كل سؤال و أمشى مع الأسهم هتعرفِ أنتِ بشرتك أيه ببساطة 
أو نعمل التجربة السريعة دي سوا 

الطريقة اللي أحدد بيها نوع بشرتي؟

هتعملِ خليط من الملح و ماء ساخنة 
وتسبيها لحد ما تبرد خالص  
وبعدين تستخدميه على وشك
وتسيبي المكس ده (الماء +الملح ) عشرة دقائق فقط. 
وبعدين تغسلى وشك بماء بارد
بس كده
بعد ساعة تقريبا هتاخدى منديل /كلينكس نظيف وتفرديه على وشك ونضغط بالمنديل على وشنا برفق

توزيع الدهون واضح على الصوره اللى حطتهالكم (الصور دى مش بتاعتى موجوده فى مواقع كتير جدا ابحثوا هتلاقوا تفصيل و شرح كتير بس حاولت ابسط الدنيا ) 
اختبار لمعرفة نوع البشرة وتوزيع الدهون


_ لو لقينا دهون بسيطة / قليلة في المنديل في أماكن متفرقة يبقى كده
بشرتنا بشرة عادية/ NORMAL SKIN 
 و بتتميز البشرة العادية إن دهونها اللي بتفرزها بسيطة وإنها بشرة قوية قليلة الجفاف ومسامها غير مرئية وعادة لا تعاني من الحبوب أو حب الشباب بس ده مش معناه أنه مش بيطلعلها حبوب
لا بيطلع ممكن يكون نتيجة حساسية أو لغبطة هرمونات بس مش دائما معرضة للحبوب.
_______________________

-لو لقينا دهون على المنديل متمركزة في منطقة الجبين والأنف والذقن وباقى المنديل مش عليه آثار دهون
ده معناه أن بشرتنا مختلطة/ COMBINED  SKIN 
 و ده هنلاقي البشرة دائما بتعاني من لمعان المنطقة
 دي المسماه T-ZONE  وهنلاقي البشره بتعاني من مسام واسعة عند الخدين
وبتعاني من الرؤوس البيضاء والسوداء ومعرضة لحب الشباب.
_______________________

-لو لقينا الدهون موجودة على كل المنديل كده يبقى
بشرتنا دي بامتياز  بشرة دهنية /OILY SKIN 
 و هنلاحظ دايما لمعة كبيرة غير محببة على كل البشرة وعادة بنعاني بقوة في فصل الصيف والرطوبة العالية
 ومسام واسعة واضحة ومعرضة بقوة لحب الشباب المستمروظهور البثور البيضاء و السوداء و بتحتاج عناية مستمرة وغسل البشرة مرتين في اليوم حتى لا تتراكم الدهون والأوساخ وتسد المسام.
بس زي ما فيها عيب ليها ميزة قوية المحتوى الدهني العالي بيأخرعلامات تقدم السن والتجاعيد والبشرة بتتميز بالمرونة.
___________________________________

-لو ملقناش محتوى دهني يبقى ـكيد بشرتنا بشره جافه /DRY SKIN 
وهي تماما عكس البشره الدهنية يعني أكثر وقت بتعاني فيه هو فصل الشتاء من الجفاف التام. بتعاني ممكن من ظهور القشور بتحتاج ترطيب عالي ومرطبات تقيلة شويه مش الخفيفة
البشره الجافة نادرا لما بتعاني من حب الشباب وغير معرضة للبثور البيضاء أو السوداء بس بتحس دايما أنها مشدودة غير مرنة
عيبها إنها زي ما قولنا عكس الدهنية فهى أول البشرات المعرضة لظهور علامات تقدم السن و التجاعيد
ومحتاجة برضه عناية بالموضوع ده واهتمام من بدري
________________________

و فيه النوع الأخير اللي هو البشرة الحساسة/ SENSITIVE SKIN 
 و دي هنلاقيها دايما بتعاني  من الإحمرار من أقل حاجة زي مثلا  التعرض للشمس  أو حكة مستمرة
 علشان كده لازم يأخدوا بالهم من مكونات المنتجات اللي بيتسخدموها والأفضل منتجات البشرة الحساسة والمتابعة مع طبيب.


كيفية التعرف على البشرة والعناية بها


طيب عاوزة أقول حاجة كمان عادي جدا أن بشرتنا تبقى نوعين مع بعض يعني ممكن دهنية حساسة أو جافة حساسة عادي جدا

وعادي كمان أن ممكن أصحاب البشرة المختلطة نلاقيهم فى الصيف بيعانوا من إنها مختلطة مائلة للدهنية وفي الشتاء نلاقيها بقت مائلة للجفاف.
فعادي هو ده اللى بنتكلم عليه
لازم نعرف بشرتنا ايه بالظبط وبتحتاج ايه أمتى ولما بنعرف كده مش هنحتاح نصرف فلوس فى تجارب ممكن تبقى سيئة وغير مجدية وضررها أكثر من نفعها.

كده يبقى اتكلمنا بالتفصيل أزاي أميز نوع بشرتي وعلى أساسه هنتكلم سوا المرات اللى جاية عن الروتين المناسب لكل بشرة
 وفي مرة إن شاء الله  هعرض معاكم روتيني الخاص
خلصنا
يارب تكونوا استفدتوا
  دمتم جميلات ....

عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming