MermaidCharming MermaidCharming

آخر الأخبار

جاري التحميل ...

بان كيك صحي بالشوفان /HEALTHY FLUFFY OAT PANCAKE

بان كيك صحي بالشوفان 

بسم الله الرحمن الرحيم 
عاملين يا حلوت 
صباح الخير 
تدوينه فى السريع خالص 

لو صاحيين زى حالاتى كسلانين و نفسكم فى فطار شهى و سريع و صحى يبقى الخيار الأمثل هو 

بان كيك صحي بالشوفان /HEALTHY FLUFFY OAT PANCAKE 

بتفضل بالساعات شبعان و كمان طعم شهى جدا جدا 
هقولكم المقادير المظبوطه الكميه دى عملت معايا حوالى10 وحدات بان كيك حجم وسط زى الصورة كده 
لو هتعملى فطار ليكى لوحدك قللى الكمية لو هتعملى الفطار لاكتر من شخصين زودى المقادير طبعا 
يلا بينا 

المكونات 

2 بياض بيض (ممكن البيضه كلها بس كده أقل فى السعرات شويه )
معلقة فانيليا سائلة
 2 معلقة عسل 
معلقة زبادى قليل الدسم 
كوب و نص شوفان مطحون ناعم 
كوب لبن قليل الدسم 
معلقة كبيره بيكنج بودر

ممكن نضيف موزه مهروسة و عليها نص معلقه قرفه (لو حابينه بان كيك حلو ) وده اختيارى انا بحب اعمله كده علشان لو حد بيحب ياكله بالجبن مع البان كيك 

الطريقة

كله فى الخلاط و نضرب 
بياض البيض نضيف عليه الفانيليا و معلقتين العسل و معلقة الزبادى و نضربه كويس فى الخلاط و بعدين نبدأنضيف اللبن بالتدريج و معلقه البيكنج بودر 
ثم نضيف الشوفان المطحون تدريجيا و نضرب جيد جدا الخليط بتاعنا 
لو حسينا الخليط سائل اوى نضيف شوفان 
لو حسناه تقيل زيادة عن اللزوم نضيف لبن 

و على طاسة سيراميك /تيفال غير قابله للإلتصاق 
نحط حتة زبدة صغننة كده و فيه ناس بتعمله بزيت جوز الهند (بس مجربتش )
و ننزل شوية من الخليط على الطاسة السخنة و نتحكم فى الحجم براحتنا

السؤال المهم نقلبه امتى
هنلاقى طلع فقعات صغننة كده لما نلاقيها يبقى الجزء اللى تحت استوى و اخد لون نقلبه على الوش التانى بس كده
سهلة خالص و طعمه جميل فعلا
و ممكن يبقى سادة كده او حلو بالموز
و ممكن بقى فى التقديم انا فى الصورة حاطه عليه معلقه زبدة فول سودانى و معلقتين عسل عند التقديم
فيه حد يحب يحط جبنة لايت مثلا او عادية و عليها عسل
او سيرم تفاح
او قطع موز عند التقديم
او صوص شيكولاته
او ممكن فراولة او توت
حاجات كتير اوووى فى التقديم اشكال
لما اعمله تانى بشكل تقديم مختلف هنزله لو حابين

أما دى كانت وصفه صحية جدااا حتى معلقة الفول السوداني صحية جدا
بس خلاص خلصنا
مش بتاخد ربع  ساعة كاه فى الخلاط و على الطاسة السخنة  و بتفطر فطار طعمه جميل و مرتب
و نسيت فى الماركت فيه بيبقى جاهز الخليط على الطاسة علطول و فيه فى ايهرب كمان

صباحكم جميل
سلام ..
دمتم جميلات ...


عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming