MermaidCharming MermaidCharming

آخر الأخبار

جاري التحميل ...

اختبار مسامية الشعر؟ والعناية المثالية لكل أنواع الشعر | HAIR POROSITY

اختبار مسامية الشعر HAIR POROSITY 
بسم الله الرحمن الرحيم 
يا مساء / صباح الجمال عليكم صبايا


صراحة موضوع النهاردة المفروض ده كان يبقى أول موضوع نتكلم فيه سوا فى الشعر بس للأسف بدأت بحاجات و تجارب تانية.
بس يلا ملحوقة و نحكي فيه النهاردة بالتفصيل

 اختبار مسامية الشعر ؟ و أهميته للعناية المثالية للشعر /HAIR POROSITY 

أولا هسألكم سؤال كام مرة حد قالك على زيت أو خلطة حلوة جدا للشعر و سحر وجبتيه وجربتيه على كلامه وفي الآخر لقيتي نتيجة سيئة جدا العكس تماما !!

معتقدش محدش فينا معملش كده وبالذات واحنا في الأول و بنكتشف طريقنا في العناية بنفسنا
هل ده معناه أن المنتج وحش أو سىء أو اللي قالك ده بيكذب عليكِ.
الإجابة ببساطة لا طبعا الفكرة كلها أن زي ما بشرتنا و جسمنا مختلف عن بعض شعرنا برضه كده مختلف عن بعض.
وده موضوع النهاردة.

نصنف شعرنا على اساس ايه:



الأول سابقا كان دايما مشهور تصنيف الشعر على حسب دهني / جاف/ عادى 

بس بشوف أن التصنيف ده مش صحيح أوي لأن تصنيف دهنية الشعر ده بيرجع للفروة
إنما التصنيف الأصح هو التصنيف حسب مسامية الشعر وده موضوع النهاردة

ممكن يكون حد صادف الكلمة دي و عرف شعره.


وممكن حد تاني يكون لسه بيتعرف فأحب أوضحك الموضوع بصورة سهلة علشان كل واحدة فينا تكتشف الطريقة الصحيحةل كيفية العناية بالشعر ومعرفة المناسب ليه.

أولا يعني ايه مسامية الشعر:
الشعر زي البشرة تمام ليه مسامات وطبقة خارجية وداخلية، ولكن صعب رؤيتها بالعين المجردة مثل مسامات البشرة.

معنى المسامية ببساطة هو قدرة الشعر على امتصاص الرطوبة والحفاظ عليها  داخل الشعرة وده بيبقى بناء على الطبقة الخارجية للشعرة اللي هو أسمها (الكيوتيكل).

Hair Porosity: the hair ability to absorb and retain moisture

على حسب المسافات اللى بين الطبقة الخارجية هو ده اللي بيحدد المسامية (ملوش علاقة بشعرك تقيل ولا خفيف أو ناعم أو مجعد )


لو الطبقه الخارجية قريبة ومتراصة بجوار بعضها  مفيش مسافات ده معناه أن الشعر منخفض المسامية.


لو الطبقة الخارجية بعيدة عن بعضها والمسافات بينها كبيرة ده معناه أن الشعر عالي المسامية


لو المسافات طبيعية يبقى الشعر ده متوسط  المسامية



طيب أعرف أزاي نوع شعري و هيفرق معايا في ايه ؟


 أولا كيفية التعرف على مسامية الشعر:

 فيه اختبار بسيط دقيق إلى حد ما (بس لو محتاجين حاجة دقيقة جدا يبقى المختبر و الطبيب اللي يحدد)
هنجيب ماء في كوب و نحط فيها شعرة  مغسولة / نظيفة (بس يكون شعرنا مغسول و نضيف مفهوش أي زيوت أو كريمات)
هتلاقوا الصورة موضحة مكان الشعر هتبقى فين ومكانها ده اللي بنحدد على أساسه (حاولت أرسم وأكتب فاستحملوني بقى ) 

لو الشعرة دي فضلت على سطح الماء: يبقى معناه إن المسافات في الطبقة الخارجية صغيرة جدا مسمحتش للماء تدخل جواها يبقى

زي ما قولنا المسافات صغيرة يبقى الشعر منخفض المسامية.

لو الشعرة غاصت و نزلت لآخر الكوب: ده معناه إن المسافات في الطبقة الخارجية كبيرة وواسعة سمحت للماء تدخل جواها وغرقتها 

ويبقى زى ما قولنا المسافات واسعة ده معناه إن الشعر عالي المسامية.

لو الشعرة فضلت عالقة في نصف الكوب يبقى نوع الشعر ده متوسط المسامية

المسافات فيه متوسطة تسمح بدخول الماء بشكل معتدل جوه الشعرة.

و ممكن برضه تلاحظوا إن الناس اللي شعرها بيكش من الرطوبة بسرعة ده معناه شعر عالي المسامية

أو لو مثلا شعرك مش بيلقط الحنة أو الصبغة أو مش بيتبل بالماء بسرعة ده معناه أنه منخفض المسامية

عادة مسامية الشعر بتكون تبعا لعوامل وراثية


بس ممكن نوع شعر يتحول من نوع لآخر نتيجة الإهمال أو بعض الأخطاء اللي بنسويها (يعنى ممكن شعر منخفض المسامية يتحول لعالي المسامية)

نتيجة معالجة كيميائية / فرد / تمليس أو تعرض للشمس كثير وتلف أو ممكن بنغسله بعنف بالشامبو ونفركه جامد أو بننشفه غلط  أو بنسرحه وهو مبلول أو بفك التشابك بطريقة غلط أو بنطوله زيادة عن اللزوم و يبقى تالف أو متشابك كثير (فيه شعر طويل و صحي)
حاجات كثير ممكن نعملها عن غير قصد تضرنا.


طيب هنستفيد أيه لما نعرف مسامية شعرنا؟ 


هنستفيد كتير هنحط إيدينا على مفتاح أزاي كل بنت فينا تعرف تعتني بشعرها ؟


معلومة سريعة ناخد بالنا منها  الزيت مهم جدا بعد الشاور
لأن الزيت بيحبس الميا داخل الشعرة أو داخل البشرة  يعنى بعد الشاور محتاجين نحط زيت على شعرنا علشان نحافظ عليه رطب و نحبس الماء جواه (الماء المرطب الاساسي للشعر ناخد بالنا )
وأحنا زي ما بشرتنا محتاجة الماء شعرنا برضه محتاج الماء علشان كده استخدام زيت يومي أو سيرم ده بيبقى بيرطب من الخارج بس 
إنما الماء محتاجينها داخل الشعرة علشان نحافظ عليها طرية ومرنة.

وبما أننا عارفين إن الطبقة الخارجية للشعر بتبقى بروتين وكيراتين

فأحنا لما نعرف مسامية شعرنا هنعرف الخلطة الصحيحة ايه 
يعني محتاجين نعرف نزود البروتين لا نزود الزيت محتاجين الشعر ينشف ولا يطرى.

البروتين زي (المايونيز / العسل /جوز الهند)


مثلا يعني لو شعرنا عالي المسامية يبقى محتاجين نزود البروتين علشان نغلف الشعرة من بره ونقدر نخليها صلبة وتحتفظ بالرطوبة ومتفقدهاش بسرعة.


إنما مثلا لو شعرنا منخفض المسامية فهو صلب كفاية مش محتاجين نزود البروتين فيخليه ينشف أوي محتاجين هنا الزيت يبقى أكثر علشان يحافظ على الماء داخل الشعرة ويديها ليونة أكثر.



هوضحلكم أكثر طريقة العناية بكل نوع مسامية شعر:


العناية بالشعر المنخفض المسامية:


زي ما وضحنا ان الشعرة بتبقى مسطحة والمسافات على سطحها قريبة جدا وغالبا الشعر ده بيبقى صحي مفهوش مشاكل بس بيكون صلب شوية و صعب ترطيبه بسبب المسامات المتراصة بجوار بعضها ومفيش مسافات لأنه صعب يمتص الرطوبة وإذا امتصها صعب يفقدها وبالتالي هتلاقي النفشة فيه قليلة بس محتاج ترطيب مكثف.


علشان كده يفضل لما نأخد شاور نغسل شعرنا بماء دافية علشان نفتح المسامات أو نستخدم حرارة بس مش بصورة مباشرة علشان نساعد إننا نفتح المسامات و يقدر يوصله المادة المرطبة.


وطبعا الأفضل إننا نبعد عن البروتين العالي لأنه هيترسب على الشعرة  ويمنع وصول الماء والزيت و بالتالي هيسبب الجفاف.

البروتين زي ايه (المايونيز / العسل / جوز الهند ) و نبعد عن الزيوت التقيلة زى جوز الهند و الخروع 
(مع إن فيه خلاف بين هل زيت جوز الهند من الزيوت التقيلة ولا الخفيفة)

ونبعد عن منتجات السيلكون علشان برضه متترسبش على الشعرة وتسبب عازل و مقدرش أوصل المادة المرطبة
فيه هنا تدوينة على السيلكون هل هو فعلا ضار أو مفيد للشعر و استخدمه أمتى ( اضغط هنا )

و نبعد عن البلسم اللي فيه بروتين عالى


والأحسن طبعا نستخدم زيوت خفيفة زى زيت الجوجوبا، زيت بذور العنب، زيت الأفوكادو، زيت الأرجان، زيت المكاديما، زيت اللوز.

 و ممكن نعمل حنة للشعر كل 8 أسابيع مفيدة للشعر والعلاجات البروتينية تبقى على فترات متباعدة كل 8 أسابيع مثلا


 العناية بالشعر العالي المسامية:


طبعا هيبقى عكس كلامنا عن الشعر المنخفض ده هنلاقيه أكثر شعر بيعاني من التجعد في الصيف أو من التعرض للشمس أو التعرق وعرضة أقوى للتلف ومن حمامات السباحة ونزول البحر.


وطبعا ده لاننا عرفنا إن المسافات في الطبقة الخارجية كبيرة وبالتالي بيكسب الماء بسهولة ويفقدها بسهولة علشان كده محتاجين نزود فى الجدار العازل حوالين الشعرة وده دور البروتين.

هنا نقدر نستخدم البروتين (مايونيز / جوز الهند / العسل)

وطبعا نستخدم ماء بارد في شطف شعرنا و كمان ممكن نستخدم معلقة خل التفاح مع ماء الشطف علشان نقلل حمضية الشعر (مفيش كلام أكيد بس كل ما كان الشعر أقل في الحمضية كل ما كان صحي أكثر) و نقلل من استخدام الحرارة خالص المباشرة.


ونقدر نستخدم البلسم عالي البروتين او المحتوي على السيلكون الذائب في الماء لتكوين عازل مؤقت يخلي الشعر يقدر يحتفظ بالرطوبة.


نستخدم الزيوت التقيلة (زيت الخروع، زيت جوز الهند، زبدة الشيا، زيت الزيتون) مرة أسبوعيا.


وممكن نستخدم الحنة العلاجية كل 8 اسابيع مثلا مفيدة جدا لتغذية الشعر.



(علشان كده فيه بنت تجرب ماسك المايونيز وتمدح فيه و فيه بنت تانية تجربه وتفضل تقول معرفتش أسرح شعري ونشف

الأولى شعرها عالي المسامية و ده مناسب جدا معاه وهيزود الطبقة العازلة من بره و يخلى شعرها يحتفظ بالماء و يبقى طري
التانية شعرها منخفض المسامية و البروتين اللي في المايونيز نشفه أكثر بكثير و خلاه مش قادر يدخل ماء ولا زيت للشعر جواه )
اظن فهمنا الحتة دي.


العناية بالشعر المتوسط المسامية:


ده نوع الشعر اللي قولنا بيمتص الماء بشكل معتدل ويفقدها بشكل معتدل وده هنلاقيه أكثر نوع شعر بيقبل الصبغات وبيحافظ على التسريحة بتقعد وقت.


و بنحتاج نتعامل معاه بالوسطية يعني نسب متوازنة من الزيوت ومن البروتين


مش بروتين أسبوعي ممكن كل 6 أسابيع (جوز الهند / زبدة الشيا)


وممكن استخدمه يومي زيوت خفيفة للترطيب زي الأرجان والماكاديميا.



عارفه إني طولت عليكم في موضوع النهاردة بس حبيت أشرحه شرح تفصيلي جدا 


علشان ده المفتاح الحقيقي في طريق العناية بالشعر وأنا كنت من الناس اللي بتتعامل مع شعرها غلط بس بدأت أفهمه واحد واحدة
لو حابين تسألوا حاجة طبعا هبقى سعيدة
  دمتم جميلات ........

عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming