MermaidCharming MermaidCharming

آخر الأخبار

جاري التحميل ...

طريقة التشقير فى البيت / HAIR BLEACHING AT HOME

تشقير شعر الجسم 

بسم الله الرحمن الرحيم

عاملين ايه بنات

حابه أسالكم ايه احسن طريقه بتريحكم بتتعاملوا بيها مع جسمكم و بتتخلصوا بيها من الشعر الزائد ؟
شاركونى تجاربكم و خبراتكم
احنا كنا اتكلمنا سوا قبل كده عن الحلاقه بالشفرات (لللأطلاع أضغط هنا ) 
 و دى بالنسبالى الطريقه المفضله و عاوزه اقولكم انى عامله جلسات بالليزر فى بعض اجزاء من الجسم مش كله صراحه
فدى انسب طريقه ليا بعد الليزر (السويت / الواكس ) بيحسسوا البشره جدا )
دى تجربتى الشخصيه
هنتكلم سوا النهارده عن طريقه من طرق التخلص من الشعر و هى 

طريقة  التشقير فى البيت  /  HAIR BLEACHING AT HOME 


هعرض الفكره و الحكايه من تجربتى الخاصه

انا من الناس اللى بتحب التشقير و بعتمد عليه فى اماكن من الجسم  بس بستخدمه على فترات متباعدة (مثلا بيبقى فيه شعرات خفيفه عند البطن / مش عند كل الناس ومش كل الناس بتركز او بتتنتبه ليها لكن الناس المحنتفه و محبين النظافه لو عندهم  حاجه صغيرة بتضايقهم جدا شكلها  فانا من الناس اللى بحب التشقير فى الاماكن فى الجسم زى شعر البطن الخفيف خالص ده البيبى هير و شعر الايدين الخفيف )
الحمد لله انى مش مشعرة و الشعر فى المناطق دى بيبقى وبرى خفيف زى الزغب اللى فى الوجه 

مش برجح التشقير للوجه وده طبعا لان طبيعه شعر الوجه رقيق و بيتحسس بسرعه وكمان لاننا بنتعرض للشمس فبيبان فى الشمس الشعر الفاتح
اما فى الجسم بيدى مظهر طبيعى خالص ومش بيبان الشعر الفاتح فى الاضاءه العاديه اللى فى بيوتنا

بشوف من تجربتى ان التشقير ينفع جدا للبنات اللى بتحسس من الواكس او السويت و بيبقى عندها شعر مش مرغوب فيه

و التشقير مناسب جدا للبنات اللى بشرتهم فاتحه او حنطى فاتح اما لو لون البشره غامق مش بيبقى حلو بيبقى باين اوى التشقير حتى فى اضاءه البيت العاديه او بيقلب معاهم على لون اورانج مش حلو 

التشقير بيدى تنوير كده للايد و اشراقه بس دى مش حاجه عاديه نتيجه ان لون الشعر بيبقى فاتح زى اى إزاله شعر بعدها بنحس ان لون بشرتنا بيفتح من درجه لدرجتين على الاقل

هقولكم شويه حاجات ناخد بالنا منها و نصايح كده :

التشقير بيغير لون الشعر بيخليه مناسب لبشرتنا النتيجه بتقعد حوالى من اسبوعين ل 3 اسابيع تقريبا بالكتير

وفيه انواع تقشير جاهزه انواع كتير زى JOLEN  و FADEOUT
هحاول ادور على صور قديمه ليهم عندى و انزلها لانى حاليا مش لقياهم  فى الماركت جنبى للاسف

جولين اللى موجود منها نوع واحد و من احسن الانواع فعلا هو مشكلته انه بياخد وقت اكتر يعنى مش ربع ساعه و تاخدى النتيجه لا ممكن تستنى مثلا نص ساعه و تشليه هتاخدى النتيجه مرضيه وهو فعلا جميل  فعلا مش بيحسس البشره ولا بيهيجها
 اماFADEOUT هتلاقى منها انواع اختارى اللى يناسب بشرتك حساسه ولا عاديه
او نوع تشقير عادى و فيه تشقير بالتبييض

اختاروا دايما النوع المناسب لبشرتكم فى اللون او فى الحساسيه إذا بشرة عادية او بشرة حساسة

بكرر انا مش بحب التشقير للوجه ولا برشحه خالص (طيب لو حد هيستخدمه للوجهيختار نوع كويس جدااا و يبعد فى التشقير عن منطقه العين خالص ) وياريت لو فيه حبوب فى الوجه ابعد عنها
ومتعرضش للشمس على الاقل يوم كامل

فيه نوع كمان اسمه JOLIEVA   بس تجربتى معاه مش حلوه قاسى جدااا و بيسبب تهيج كبير اوى لبشرتى
لا يستخدم التشقير على الحبوب او الندبات اللى فى الوجه او الشامات فأنا مرشحوش ابدا لأى بنت 

ولو فيه اى التهاب فى الجلد او حساسيه او حرق من شمس او من غيره ابعد انى احط عليه كريم التشقير
التشقير غير مناسب للاماكن اللى متعالجه قبل كده بالتقشير الكيميائى زى الريتنول مثلا

هنقول شويه نصايح ناخد بالنا منها و الطريقه الصحيحه للتشقير:

اولا نختار النوع الصح زى ما قولنا المناسب لنوع بشرتنا و المناسب للشعر سواء نوع لشعر الوجه او نوع لشعر الجسم

كريم التشقير لما نخلطه نبعد اننا نخلطه فى اناء معدني لانه كده بيتفاعل معاه ممكن فى طبق بلاستيك او سيراميك

نلتزم بالتعليمات اللى مكتوبه عليه النسب للخلط بين الكريم و البودره (انا خلط الكميه كامله كل البودر على كل الكريم و استخدمه مره واحده ) هتلاقوه فى الصورة عبارة عن كريم و بودر فى عبوتين 


بعد الخلط نستنى 5 دقايق و بعدين نستخم الخليط بتاعنا

قبل ما نستخدمه نغسل المكان اللى هنشقره بالماء البارد و الصابون يكون المكان رطب و نظيف  (بلاش الماء الساخن علشان ميفتحش المسام و كمان علشان ميسببش حساسه )

قبل التشقير نعمل اختبار على جزء بسيط و نشوف جسمنا هيتقبله عادى ولا هيتحسس منه و يسبب احمرار

بعد ما فردنا الخليط على المنطقه اللى بنشقرها حوالى 15 دقيقه لو جينا نزيله لقيناه لسه شويه مخدش اللون الفاتح نفرده تانى و نسيبه 15 دقيقه كمان 

بعد التشقير نشطف المكان بماء بارد و نرطب المكان ده كويس جدا و يفضل يكون خالى من العطور 


و يفضل لو عملنا التشقير فى الوجه اننا منتعرضش للشمس اليوم ده علشان ميحلش اى التهابات و حساسيه لبشرتنا
وطبعا لو شقرنا الوجه نبعد تماما عن منطقه العين


طيب هقولكم عن تجربتى الشخصية مع التشقير:

انا عندى  شخصيا شعرات ايدى خفيفه جدا و فاتحه اللون لا تستحق بقى انى اعملها ازالة بطرق صعبه فبعتمد على التشقير
بعمله على فترات متبعدة
قبل ما اعمل تشقير بحط نقطتين تلاته كده من زيت اللوز على ايدى برطبها ترطيب خفيف
و ممكن كمان ازود على كريم التشقير وانا بخلطه نقطتين من زيت اللوز الحلو

ملحظتش نهائى  أى زيادة فى الشعر باستخدام التشقير و ملحظتش اى غمقان فى لون الجلد او حاجه كده

نسيت حاجه مهمه احساس الوخز ده عادى هتحس بشكات خفيفه كده اول ما نحط كريم التشقير بعد شويه خلاص الاحساس ده بيروح
انما لو الاحساس ده كبير او احمرار او التهاب و تهيج فى الجلد شيلوه علطول و اشطفى بماء بارد و حطى كريمات فيها ستيرويد علشان الالتهابات و رطبى كويس

تقريبا كده قولت كل حاجه فى دماغى لو افتكرت اى معلومه تانى هزودها و لو عندكم أسئلة تانى او تجارب احكوها

                                               دمتم جميلات...




عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming