MermaidCharming MermaidCharming

آخر الأخبار

جاري التحميل ...

وصفة كرواسون ناجح في البيت /CROISSANT RECIPE

الكرواسون الهش المورق في البيت


هلا هلا
صباحكم / مساكم برائحة المخبوزات الطازجة اللي لسه طالعة من الفرن في البيوت
أظن دخلة مناسبة لموضوعنا النهاردة
ايوه هنعمل سوا واحدة من أحب المخبوزات لينا كلنا بطريقه سهلة و معتمدة وهتدى نتيجة زي الجاهز بالظبط
هنعمل سوا الكرواسون
نمشي سوا على الخطوات بالظبط هتلاقوه تحفة جداااا مش متعب خالص
بس بياخد وقت في تخميره مش أكتر
يلا نبدأ


المكونات    

كوب و نصف ماء
معلقة كبيرة خميرة
معلقتين سكر
معلقة صغيرة خل أبيض
ربع كوب زيت نباتى
معلقة صغيرة أوي فانيليا
5 أكواب دقيق (أسمر / أبيض اللي تحبوه )
نص معلقة ملح
معلقتين لبن بودرة (اختياري)
زبدة مذابة حوالي 100 جم تقريبا

للدهان   

صفار بيضة
معلقة صغيرة نسكافيه
معلقة كبيرة حليب


الطريقة:       


في بولة العجن هنبدأ نحط كل السوائل سوا

هنحط الماء والسكر ونذوبهم كويس وبعدين الخميرة وندوب كويس والزيت النباتي والخل ومعلقة الفانيليا
ومعلقتين اللبن البودرة  (تمام كده الميكس السائل ده)

هنبدأ ننزل الدقيق واحدة واحدة عليه معلقة الملح لحد ما يبدأ يتقل نبدا نعجن بإيدينا (كل ما زادت مدة العجن بيكون أحلى وأطرى وأنجح)

لحد ما هتلاقيها مش بتلزق العجينة كده تمام ؟!

(انا بستخدم ميكس من الدقيق الأسمر وأزود قليل قليل دقيق أبيض بحاول أقلل الدقيق الأبيض على قد ما أقدر )

هنبدأ نشكل العجينة كور صغننة بالحجم المناسب ليكم (خلوا حجمها وسط مش كبير أوي علشان يدي طبقات كثير وأخف وكمان حاولوا كلهم يبقى حجم واحد علشان لما نفردهم يبقوا نفس حجم الدواير)

هنسيب العجينة المتشكله كور ترتاح ربع ساعة (شبه الصورة بعد ما ارتاحت كرات العجين ربع ساعة)





وبعدين نبدأ نفرد كل كورة عجين على شكل دائرة وبعدين نفرد عليها طبقة من الزبدة المذابة (ممكن فوق طبقة الزبدة رشة نشاء علشان يفضل طبقات منفصلة)


و نبدأ كل كورة عجين نفردها دايرة و نفرد عليها الزبدة و بعدين رشة نشاء ونحطها على الدائرة اللي قبلها وبكده كلهم هيكونوا فوق بعض كده

لغايه ما نخلص كل العجين و يبقى عبارة عن طبقات فوق بعضها دواير بين كل واحدة و الثانية زبدة مذابة ورشة نشاء
طبعا آخر طبقة عجين فوق مش هنحط على وشها زبدة هنسيبها كده

و بعدين ندخل العجين بتاعنا التلاجه نص ساعه أو الفريزر ربع ساعة علشان الطبقات كلها تمسك في بعضها علشان الزبدة هتجمد وتمسك طبقات العجين مع بعض


تمام لحد كده سهل خالص


خلاص كده هنطلعه من الثلاجة وعلى الكونتر بتاعنا نبدأ نفرد العجين (الطبقات كلها بتبقى ماسكة في بعض بيبقى كأنه عجينة واحدة متماسكة متخافوش مش بيفك من بعضه ولا حاجة خالص الزبدة بتمسكه كله في بعض)

نفرده دائرة كبيرة سمكها معقول                                 

و نقطع الدائرة بتاعتنا أربعة أربع، كده بقى عندى 4 مثلثات كبار


هنقطع كل مثلث على العدد اللى عاوزينه لمثلثات صغيرة


ونيجي عند كل مثلثت من تحت  نقطعه قطعة صغننة بالسكينة (شق صغنون) وبيبقى ده الإتجاه اللي بنحط عليه الحشوة بتاعتنا (باين فى الصوره القطع اللي بنعمله فى آخر المثلث وعملت علامة على المكان اللي بنحط عليه الحشوة ونبدأ نلفه)





خلاص نبدأ نحط الحشوات بتاعتنا (لبنة / تركي / لوز / شيكولاته ....)

بنحط الحشوة عند قاعدة المثلث بتاعنا و نبدأ نلفه لحد قمة المثلث كده بيطلع معانا شكل الكرواسون الجميل
نلف كله كده من الجزء العريض للرفيع.

بس ونسيبه الكرواسون بتاعنا في الصينية يخمر حوالي ساعة ساعة ونص وبعدين نشغل عليه الفرن على حرارة 200 مش هيأخذ ربع ساعة


ندهن الوش بتاعه بالميكس (صفار بيض + نسكافيه + معلقة الحليب )

ونفتح الشوايه عليه يأخذ لون الكرواسون الذهبي الحلو ( شبه الصورة كده )

بس كده خلصنا




ممكن بعد ما يطلع ناس ترش سكر بودر وممكن قطر / شربات كلها اذواق



و خلاص خلصنا

سهلة بس محتاج تمشوا على الوصفات بالظبط هيطلع هش و طعمه تحفففففة 
ريحة المخبوزات في البيت بركة وخير حاولوا تتجمعوا وتعملوا فطار حلو كده يوم الأجازة الصبح و تملوا البيت بركة مع اللي بتحبوهم
                           
 دمتم جميلات ...
هنى وعافية...



وصفة كرواسون ناجح في البيت

الكرواسون المورق الهش في البيت






عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming