MermaidCharming MermaidCharming

آخر الأخبار

جاري التحميل ...

طريقه دجاج الكانتون الصيني السهل السريع / CANTON RECIPE

دجاج الكانتون الصينى السهل السريع بطعم المطاعم بس فى البيت 


 بسم الله الرحمن الرحيم

طن طن
لقد حان وقت الغداء هنعمل أكلة جميلة جداا بنحب نأكلها بره البيت جدااا و بيحبها الصغيرين والكبار والناس اللي بتحب سويت أند سور sweet and sour يبقى الوصفة دي بتاعتكم
هنعمل سوا فراخ كانتون الصيني
وصفة مطاعم بس هنعملها في البيت وهتبقى أحلى من بره كمان
هتلاقوا الوصفة كاملة بالتفاصيل والصور وسهلة جدا من الآكلات السريعة اللي مش بتأخذ وقت خالص

المكونات       
نص كيلو صدور فراخ
بهارات (ملح - فلفل اسمر - جنزبيل - ثوم بودر - كاري- بابريكا - أوأي بهار بتحبوه ...)
بيضة
كوب دقيق
نشاء
بصلة كبيرة متقطعة قطع صغيرة
فلفل كبى أخضر وألوان
معلقة صغيرة ثوم مهروس
جزر متقطع قطع
2 معلقه كاتشب
4 معالق صويا صوص
معلقة خل
2 معلقة صوص باربكيو ( اختياري )
كوب ماء
زيت
مكرونة / نودلز / أرز (اللي تحبوه تأكلوه معاه )

نبدأ الطريقة سوا      

الأول الصدور بعد ما نشطفها كويس هنقطعها مكعبات صغيرة أو شرائح الشكل اللي تحبوه



قطع الفراخ مكعبات 


ونبدأ نحط عليها البهارات بتاعتنا (ملح  - فلفل - جنزبيل - بابريكا - ثوم باودر ) و نضيف عليها بيضة مكسورة
ممكن نسيبها في التلاجة ساعه بس لو مستعجلة نعمل على طول و هتبقى حلوة جدا برضه
بعد اضافه البهارات و البيضه على مكعبات الفراخ 


هقولكم very good tip علشان وأحنا بنعمل ال coating الغلاف للفراخ
بدل ما نعمله قطعة قطعة
نجيب كيس بلاستيك نحط فيه الدقيق و عليه معلقة كبيرة نشا و شوية من البهارات اللي حطناها على الفراخ
وبس نحط قطع الفراخ جوه الكيس ونقفل الكيس و نبدأ نرج الكيس جامد
هنبدا نعمل كوتينج للفراخ بالدقيق والنشا 

هنلاقى كل افراخ خدت نفس طبقه الكوتنج بتاعنا / الغلاف كلهم متساويين و اسهل و انجز من اننا نعمل واحده واحده


مكعبات الفراخ جاهزه على التحمير علطول 

طيب ليه بنحط النشا على الدقيق (علشان يدى قرمشة وكمان ميخليش الفراخ وهى بتتقلى تاخد لون بسرعة وهي لسه مستوتش
بيأخر إنها تاخد لون سريع على النار فبيخلي التسوية أحسن )



وبس فى زيت غزير سخن نبدأ نقلي الفراخ بتاعتنا و تمام جدا جدا خلصناها
زيت عزير ساخن 

نحضر الصوص بتاعنا
معلقين الكاتشب + 4 معالق صويا صوص + معلقين باربكيو صوص + معلقة خل + معلقة سكر / عسل + كوب ماء ونضيف معلقة نشاء كبيرة ونقلب الخليط بتاعنا و نخليه جاهز هنضيقه على الخضار ( ذوقوا واظبطوا الطعم الحلو و الحادق فيه زي ما بتحبوا )
الوصفة الأساسية فيها أناناس
مكونات الصوص بتاعنا 


في قلاية سخنه فيها معلقتين زيت هنحط جنزبيل فريش ومعلقه ثوم مطحون وننزل بعد كده بالبصل المتقطع قطع صغيرة
ونقلبهم تقلبتين كده يبدأ الرائحة تظهر.
نحط الجزر و نقلب شوية وبعدين ننزل بالفلفل الالوان المتقطع شرائح (مش بحب أخلي الفلفل مهري وطري أوي بحبه يبقى فيه قرمشة كده في الأكل مش ببالغ في تسويته .. وهي أذواق)
و ننزل بالخليط الصوص بتاعنا اللي حضرناه  ونسيبه على النار شوية الصوص هيتقل بسبب النشاء


بعد اضافه الصوص على الخضار و نسيبه يتقل قوامه 

و نضيف قطع الفراخ المقرمشة ونسيبهم سوا حوالى 10 دقائق بس كده خلصنا


ضفنا الدجاج المقرمش للصوص بتاعنا و نسيبهم سوا 

أحلى وألذ وأنضف دجاج كانتون يتأكل وشبه بالظبط المطاعم
ووجبة مختلفة نكسر بيها الملل.

ونقدمه بقى مع النودلز أو المكرونه الشرائط / الإسباجيتي او الأرز في كل أحواله طعمه تحفة
خلصنا غداء النهاردة
يارب تعجبكم
هنى وعافية
  دمتم جميلات ...
الاكله جهزت على التقديم 


عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming