MermaidCharming MermaidCharming

آخر الأخبار

جاري التحميل ...

حلاقة شعر الجسم بالشفرات ( الشيفنج ) ؟ وتجربتي مع جيليت بريز/BODY HAIR REMOVAL BY VENUS BREEZE

حلاقة شعر الجسم بشفرات فينوس بريز

بسم الله الرحمن الرحيم 

صباح/مساء الحب والجمال عليكن

اهلا بيكم بنات  تاني من جديد يارب تكونوا كويسين و بتستفادوا من المواضيع اللي بنتكلم فيها سوا 

ويارب موضوع النهاردة يعجبكم 


هتكلم معاكم النهاردة عن موضوع  دايما شاغلنا و مهم وهو اإزالة الشعر 

فيه طرق كتير وعادات كتير بتختلف من شخص للتاني 
النهاردة بالتحديد هتكلم عن (حلاقة شعر الجسم بالأمواس/الشفرات )

بصوا خلينا نتفق من الأول اللي يناسبني مش لازم يناسبك و اللي يناسبك مش لازم يناسبني. 


بس أنا هنقل تجربتي لعل وعسى حد شبهي يستفيد أو يكون عنده تساؤلات نجاوب عليها سوا.


و هكلمكم كمان عن شوية نصائح نأخد بالنا منها علشان تبقى النتيجة أحسن. 




طيب أنا معرفتي بالشفرات كانت مع بداية إني بدأت جلسات الليرز كان لازم اعمل شيفنج قبل جلسة الليزر وحبيت فكرته.


وبعدين بدأت استخدمه من بعدها وأصبحت بعتمد عليه بشكل كلي تقريبا حاليا. 


بستخدم الشفرات في الأماكن اللي عملت فيها ليزر وأي مكان في جسمي كله (الإبطين- الإيدين-الرجلين).


ملحوظة: لأن الأماكن اللي عملنا لها ليزر بنات لا يصلح بعدها نستخدم سويت أو واكس أو فتلة. هو الشيفنج فقططط.

 (عادة الليزر بيقلل و يأخر ظهور الشعر مش بيقضي عليه تماما علشان دي مغلوطة عند البنات laser is hair reduction not totally hair removing ) 


بما إني بنقلكم تجربتي فهقولكم أول مره استخدم الشفرات للأسف عملت على جلدي وهو ناشف مش رطب أو مبلول و دي كانت 


أكتر حاجه غلط عملتها سببلي حكة فى الجسم صعبة جداااااااا وكان بيخلينى أهرش مكنتش قادرة استحمله و للأسف والله استمر حوالى 3 أ يام  وكان إحساس بالوخز كده (شكشكه)

ومراحش واتحسنت غير بكريم من مكوناته الكوريتزون. 

فهمت بعد كده انى اللى عملته ده غلط 


الطريقة الصحيحة للشيفنج/ حلاقة شعر الجسم:


- أولا كده غسل الجسم أو المكان اللي هنعمل ليه شيفنج مدة مثلا 10 دقائق  ده علشان ينعم الشعر ويفتح المسام (انا عادة بعمل شيفنج أثناء الشاور بمبدأ كله مرة واحدة )



-  يستحسن تقشير البشرة أو نفرك البشرة جيدا بالفرشاة المخصصة للصنفرة أو استخدام سكراب الجسم أو استخدام ملح الجسم للصنفرة (أوقات بعمل الخطوة دي  وأوقات لا بس لو مش بعمل تقشير بفرك جسمى كويس باللوفة)


- بعد ما نشطف جسمنا من الصابون ممكن نستخدم جل حلاقة أو رغوة حلاقة علشان تعمل زي عازل يسهل الحلاقة و كمان للناس اللي بشرتها بتحسس بسرعة أو خايفة تحك جلدها أو يحصلها احتكاك 

أو لو بستخدموا الشفرة نفسها مفهاش جل 
(غالبا بستخدم شفره فينوس بريز وهي فيها أصلا جل أوقات علشان كده مش بستخدم  الرغوة المخصصة للحلاقة)

- وصلنا للنقطة الهامة نحلق أزاي؟


الأحسن طبعا يفضل  نحلق مع إتجاه نمو الشعر بالراحة علشان منخدش جلدنا (أوقات مع السرعة  بنسى بحلق عكس إتجاه الشعر بحس  بيعطي نعومة أكثر  بس لو حد بشرته حساسة أنصحه ميعملش كده لأنه ممكن يسببله حكة). 

- لما الشفرة تبقى فيها شعر كتير نشطفها تحت الميا علشان نشيله خالص منها علشان نقدر نحلق الشعر كويس تاني ومتفوتش شعرات  لأنها لما بتبقى مليانه مش بتشيل الشعر كله كويس. 


- بعد الحلاقة نشطف جسمنا كويس من الصابون. 


- بعد الشاور ضرورى المرطب المناسب لجسمنا و خطوة الترطيب دي مهمة جداا لأنها بتهدي الجلد و لو بشرتك حساسة أوعي تنسيها ابداااا

 ( لو حد بشرته حساسة ممكن يستخدم بعد الشيفنج مضاد حيوى زي مثلا fusicort وده علشان بيحتوي على الكورتيزون فبيقلل أي التهابات ممكن تحصل ) 

-الأفضل طبعا يا بنات أننا قبل ما نستخدم الشفرة نعقمها وبعد ما نخلص نشطفها ونعقمها برضه (بالكحول الأسبراى من أي صيدلية)


طيب لو بنعمل شيفنج لمكان زي الركبة أو الكوع الأحسن طبعا نثني كوعنا أو ركبتنا علشان نزيل الشعر بسهولة. 


ولو فيه مكان فيه ثنيات أو انحناءات نشد الجلد بإيدينا علشان نشيل الشعر أحسن و كمان من غير ما  نجرح نفسنا. 


الشيفنج أو الحلاقة من الطرق السريعة و المنجزة مشكلتها بس في معدل نمو الشعر بيبقى سريع. 

شفرات فينوس بريز الموف


بس مش دايما بتناسب كل الناس يعني عادة مش مناسبة لو حد شعره أصلا خشن أو كثيف جدا أو غليظ هيبان مسامه أو لونه هيبقى غامق



 تجربتي الشخصية مع شفرات جيليت بريز الموف:



قبل كده كنت استخدمت جيليت البينك 
اللى هى (disposable ) اللي تستخدم مثلا مرة و تترمى اللي موجودة فى عيادات الليزر أواستخدام شخصي في البيت مثلا بتبقى 3 مرات استخدام و تترمى.


كانت بالنسبة لى كويسة (مش أفضل شئ بس بتوفي الغرض) مشكلتها 
كانت بتعورني جدااا للأسف وبتسببلي شوية حكة والتهاب خفيف. 


بعد كده بقيت بستخد فينوس بريز 
(venous breeze ) اللى بيكون معايا الإيد و بغير لها الشفرات فقط 

(بتبقى عبوة فيها 4 شفرات  بتقعد معايا العبوه دي شهوووور ) 

حبيتها جدا صراحة اولا حجم الشفرة 
مناسب (حتى لمنطقة البيكيني)

 وسهلة التحرك مع ثنيات الجسم مش صلبة مش بتعور الجسم و خاصة لو مرطبة بشرتي بالماء.

هى أصلا فيها جل خاص بيها بيخليها بتحلق أسرع وأسهل من غير ما تسبب أي تهيج للبشرة أو حكة. 

سريعة و منجزة جداااا تحت الشاور في 5 دقايق بكون خلصت كل حاجة. 


-عادة بستخدمها للبيكينى( فى وجهة نظري أحسن وسيلة إزالة الشعر في المنطقة الحميمة الشيفنج وطبعا لأن المنطقة دي 


بتبقى حساس جدا  ولا يفضل ليها السويت أو الواكس خالص 

 الليزر فى المكان ده مريييح جدااا بعده في تجربتي الشيفنج.

(حتى بعد جلسات الليزر الشعر فى المكان ده لما بيطلع بيتم إزالته بالشفرات أيضا) 



-و بستخدمها فى منطقة تحت الإبطين و فى إزالة شعر الرجلين ( بس بستخدم شفرة خاصة بالبيكيني و شفرة خاصة لباقي الجسم 


مش نفس الشفري خالص و أيضا بهتم بالتعقيم جداااا) 



عيوب شفرات فينوس بريز:

 بالنسبالي في أول استخدامي للشفرة الجديدة بيبقى كميه الجل في الشغرة نفسها كبيرة شوية مش بتخليني فى أول كام مرة استخدام مش بعرف احلق كويس أوى الأماكن الضيقة 
أما الأماكن الواضحة مثلا زي الرجلين أو الإيدين عادي .

لما الجيل بيقل بتبقى ـحسن بكتير. 


سعرها يعنى يعتبر مش رخيص بس الشفرات بتقعد معاكِ بالشهور مش مدة قصيرة

و فيه أنواع كتير من جيليت بأسعار كتير. 

نمو الشعر مش بطىء أوى ولا سريع  اأوي و ده عيب الحلاقة بصفة عامة مش زي السويت طبعا أو الشمع فى معدل النمو(السويت بيخلي الشعر يأخد وقت عقبال ما يطلع تاني). 


بفكر أجرب نوع تاني من جيليت لونها أخضر لما اجربها هقولكم عليها علشان حجم الجل فيها أقل (فحابة أجربها)




عاوزة بس أقولكم حاجة فيه دايما إعلانات عن أمواس 5 شفرات أو 3 شفرات أو اثنين، وكل شوية يغيروا في العدد.
 بحس الموضوع ده تجاري بحت من الشركات و أن الفروقات مبتقاش كبيرة مقابل الفروقات المادية اللي بتبقى كبيرة بين كل موس والآخر من عدد شفرات للتاني. 


بس كده النهاردة


و هرجع أقولكم تاني كلنا مش  واحد و اللي بيناسبنا كلنا مش واحد و طبعا لازم نجرب لحد ما نعرف أيه المناسب لبشرتنا و يعطينا أحسن نتيجة ترضينا. 
  
 ودمتم جميلات ....



عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming