MermaidCharming MermaidCharming

آخر الأخبار

جاري التحميل ...

برجر تونة صحي واقتصادي /Healthy Tuna Burger

برج تونة صحي و اقتصادي
بسم الله الرحمن الرحيم
اهلاا اهلاااا 
هنتكلم النهاردة سوا عن أكله سهلة وسريعة واقتصادية وصحية وطعمها حلو جدااا شوفتوا كل ده في حاجة واحدة 
هنعمل سوا ( برجر تونة) 
أي نعم التونة هنعملها برجر يعني مش بس كل الكلام اللي فوق لا كمان تغيير عن الشكل التقليدي للتونة ومناسبة للانظمة الغذائية.
يلا نقول بسرعة أزاي 

المكونات :

علبة تونة متصفية كويس (سواء تونة في زيت أو ماء بملح )
واحدة بطاطس متوسطة الحجم مسلوقة ومهروسة 
واحد بصلة متقطعة قطع صغيرة
معلقة ماستردا (خردل )
ملح / فلفل / بهارات مشكلة (البهارات اللى بتحبوها ممكن ثوم بودر/ بابريكا /رشة جوز الطيب)
فلفل كبي مقطع قطع صغيرة 
بيضة 
بقدونس متقطع ناعم 
ممكن كمان معلقتين دقيق شوفان (ممكن نحتاجها في حالة حسيت إنه غير متماسك و ممكن لا) 

طريقة التحضير:

أولا نكسر البيضة ونضيف عليها شويه ملح و فلفل. 
ثم نضيف عليها البصله المقطعه صغير و نخلطهم سوا
ونحط البهارات المشكله بتاعتنا وكمان نضيف معلقة الماستردا ونقلب.
وبعدها نضيف البطاطس المهروسة و نقلب كله سوا كويس جداا 
ثم ننزل بعلبه التونة المتصفية و الفلفل والبقدونس 
(الصورة اللي أنا حطاها دي مكنش عندي بقدونس الصراحة )
ونقلب كله مع بعض كويس جدااا (نعجنه فى بعض يعنى) يبقى متجانس جدا سوااا 

لو حسينا انها مش متماسكة في بعضها نضيف شوية دقيق شوفان (شوفان مطحون) لحد ما نلاقيها متماسكة نقدر نعملها أقراص ومتفكش من بعضها. 

بس كده نبدأ نشكلها أقراص وممكن نخلي الأقراص مش رفيعة أوي علشان متفكش بسرعة.
ملحوظة: ممكن نسيب الأقراص بعد ما شكلناها في الفريرز نص ساعة تتماسك ونطلعها علطول على الطاسة.

في طاسة غير قابلة للالتصاق (تيفال /جرانيت/ سيراميك)  على نار متوسطة وندهنها بزيت خفيف ونطلع أقراص البرجر من الفريزر على الطاسة وممكن من غير دهنة الزيت.

تأخذ لون نقلبها على الوجه التاني بس كده يبقى لونها ذهبى جميل جدا ومش هتفك إن شاء متخفوش.

ممكن التسوية تكون في الفرن (صينية عليها ورق زبدة) ونحط أقراص البرجر وفي الفرن على حرارة 180 درجة 
 نسيبها ولما تأخذ لون نقلب على الجانب التاني وكهذا. 

طريقة التسوية الأسهل ليكم اعملوها 
تقريبا علبه التونه الواحده عملت معانا 9 أقراص برجر وعلى حسب برضه حجم العلبة اللي بتعملوها. 

وهنى وعافية
يارب تعجبكم ..
 دمتم جميلات ...

عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming