MermaidCharming MermaidCharming

آخر الأخبار

جاري التحميل ...

الفرق بين التونر و ماء الميسيلار ؟ Toner vs Micellar water



الفرق بين التونر و ماء الميسيلار ؟ Toner vs Micellar water  

مساء / صباح الحب و الجمال بنات
تدوينة النهارده جتلي فكرتها من صديقة قريبة منى جدا (ليها منى قلوب كتير )  كانت بتسألنى ينفع استخدم الميسيلار وتر كتونر ولا لا ؟
ده يغنى عن ده ولا ايه صبايا ؟
هل فيه اختلافات بين ماء الميسيلار وبين التونر ؟ هو ده موضوعنا النهاردة
يلا بينا هقولكم بالتفصيل ايه الفرق بينهم

هبدأ كلامي بالتونر:
- أولا التونر المفروض أنه بيرجع للبشره التوزان بتاعها بعد استخدام الغسول اللى هو المفروض  يكون ال ph 5.5
لأن فيه غسولات كتير ال ph بتاعها عالي ممكن يوصل ل 10 و 11 و فيه تونرز كتير فى الماركت بيبقى ال ph بتاعها أعلى من كده  بتبقى 6 و 7 وده للأسف غلط بيضر البشرة مش مناسب أنه يرجعنا لتوازن بشرتنا تانى.

المكون الأساسى فى أي تونر هو الكحول أي نعم
 زى ما قريت الكحول طبعا كتير مننا أول ما بيشوف كلمة الكحول على منتج للبشره بيقول لا طبعا مش هشتريه ده مضر

بس هفهمكم وجهة النظر الطبية لاستخدام الكحول و النسب المناسبة وضرره و نفعه ايه فى تركيب التونر
 الكحول بيتميز أنه بيطهر المسام بقوة وبيقبض المسام (بيضيقها ) وكمان بيزيل الأوساخ و الشوائب (لأن مش معنى إني استخدمت غسول اأن بشرتي نظيفة تماما بيبقى فيه حاجات أحنا مش بنشوفها بس الغسول مشلهاش )

نسبة الكحول بتبقى عادة نسبة صغيرة يعنى مش بتعدى ال 10%  وطبعا فيه أنواع بتبقى النسب أعلى من كتير كل ما النسب زادت ده بيساعد أن التونر يبقى فعال أكثر و يقبض المسام أحسن و يزيل الشوائب و الأوساخ أكثر
 والنسب العالية كده  مناسبة أكثر لأصحاب البشرة الدهنية (اللى ممكن توصل نسب الكحول ل 50% )

و طبعا أوقات بنلاقي أنواع مكتوب عليها خالية من الكحول بس ده بيبقى لعبة تسويقية من البراندات و بيكون بيحتوي على مشتق من مشتقات الكحول (اللي أكيد مش كلنا عارفين أساميها ) زى مثلا الإيثانول اللى بيبقى أضعف و أخف من الكحول.



طيب ما هي  فوائد التونر ؟؟

أنا واحدة من الناس اللى مقدرش استغنى عن التونر و لازم يكون أساس فى أي روتين أنتو ماشين عليه.

(ماء الورد يصلح كتونر بيبقى فيه كحول بنسب ضعيفة زى ال10% )

قولنا قبل كده أن التونر بيرجع لبشرتنا التوازن بتاعها ل ph 5.5  و بيعيد على نظافة البشرة زى ما  وضحنا أن الغسول مش بيشيل كل حاجة.

بيقلل من المسام  بشكل ملحوظ و بيشيل أي دهون أو شوائب و خصوصا لأصحاب البشرة الدهنية والمختلطة اللي بيعانوا من إفرزات الدهون الزيادة اللي لو متنظفتش كويس المسام من الدهون يسبب مشاكل.

بستخدمه قبل الميكب اب علشان أجهز بشرتى و بيقفل المسام  فبيساعد أن الميك اب يبان أحسن وأنضف ويثبت مده أطول

هل استخدام التونر ليه اضرار ؟

مشكلة التونر الكحول أنه ممكن يسبب للبشره تهيج أو أحمرار و لو التونر فيه نسب عالية ممكن يسبب بهتان للبشرة وبيفقدها نضارتها مع الوقت وبالذات للبشرة الحساسة وممكن يسبب جفاف.

بس هل ده يمنعنى  عن استخدامه؟

بنقيس الـأضرار قدام النفع وطبعا فوائد التونر تكسسسسسسسسسب و ضرورى لكل أنواع البشرة.

مشكلة الكحول دى مقدور عليها أننا نختار النسب الأقل و بالذات لأصحاب  البشرة الحساسة منختارش اللى يحتوي على نسب عالية جدا من الكحول ( اللى نسبة الكحول فيه عالية أول ما تحطوه هتحسوا أنه بيحرق ده نبعد عنه ولو أنه مهم لأصحاب البشرة الدهنية )


طيب دلوقتى هنتكلم عن تانى حاجه ماء الميسيلار


كنا اتكلمنا سوا بالتفصيل عن ماء الميسيلار و تجربتى مع غرنيه بالتفصيل لو حابين اضغطوا عليه و اقروه


الميسيلار عبارة عن سائل مائي بيحتوي على كرات زيت صغيرة جدا بتبقى شبه المغناطيس بتسحب الشوائب والأوساخ من البشرة كـنه غسول بس من غير رغوة




علشان كده ممكن نستخدمه اننا نزيل بيه الميكب بتاعنا ( بنحطه على قطنة و بنبدأ نمسح بيه وشنا علشان كده بستخدمه دايما معايا فى شنطتي الحجم الصغير منه فى أيام الدوام الطويلة على قطنة و فى أي مكان بنقدر نمسح وشنا بسهولة وننظفه و نزيل الشوائب ) 

حاليا فيه أنواع موجودة بيحطوا فيها تركيبة زيت شبه زيت الأرغان اللي موجود فى غارنييه  وده علشان يبقى مناسب لأصحاب البشرة الدهنية و يزيد من التنظيف وأنه يزيل كمان المكياج المقاوم للماء.

مزايا الميسيلار

 أنه لا يحتوى على الكحول عكس التونر علشان كده بيبقى مناسب جدا لأصحاب البشرة الحساسة (عادة هتلاقي أن مكتوب على الميسيلار لا يشطف بعده بس نصيحة أنه فعلا برضه حتى أحسن التركيبات مش بتشيل كل حاجة من البشرة وبنحتاج غسول بعده )

عيوب الميسيلار 

: أنه عكس التونر فى التنظيف طبعا التونر بينظف أكتر بكتير يكتسح يعني
كمان بينظف المسام بشكل أقوى و بيقفلها كمان. 

أنا شخصيا بستخدم الميسيلار أنى اشيل الميكب بليل قبل استخدام  الغسول 
او بره البيت ومحتاجة أنظف بشرتي (منجز و عملي ) 

خلاصة كلامنا النهاردة أن التونر ملوش علاقة بالميسيلار ده ليه دور و أهمية وده ليه دور وأهمية ومناسبين لكل البشرات و مهمين فى روتين العناية الخاص بينا ده لا يغنى عن ده .

بس كده أنا كده قولتلكم كل حاجة بالتفصيل  عن التونر والميسيلار. 
يارب تكون المعلومات وصلت بطريقة سهلة و مقبولة ليكم وحبيتوا الموضوع.

                                                   دمتم جميلات ....

عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming