MermaidCharming MermaidCharming

آخر الأخبار

جاري التحميل ...

ما هو حمض الهيالورونيك وفوائده للبشرة ؟ HYALURONIC ACID

حمض الهيالورنيك

بسم الله الرحمن الرحيم
ازيكم يا بنات
يارب تكونوا في أحسن حال

هنتكلم النهاردة عن حاجة أكيد اللي مهتم بال skin care هيكون مر عليه كثير واللي مش مهتم أتمنى يركز ويهتم ويضيفه لمكونات ال skin care routine بتاعه لأنه صدقا بيفرق كثير جداا

النهاردة هتكلم معاكم عن ال Hyaluronic acid   حمض الهيالورونيك

هو مش حمض بمعنى حمض يعنى مش زي الأحماض الثانية اللي بتدخل فى التقشير وكده لا ده مختلف.



ما هو حمض الهيالورونيك ؟

هو عبارة عن مادة متعددة السكريات ( polysccharide  ) يفرزها الجسم بشكل طبيعي بتتوزع على أجزاء الجسم و في الأساس الجزء الكبير منها على البشره حوالى 50% 
و الباقي على الكولاجين اللي بيدخل في التكوين بين الغضاريف والمفاصل والعين والأنسجة الضامة في الجسم.


ما هي وظيفة حمض الهيالورونيك ؟

عادة البشرة بتتكون من سوائل ماء ومواد بروتينية زي الكولاجين  فيقوم حمض الهيالورنيك بمساعدة البشرة في التحكم في الرطوبة والتحكم في مخزون السوائل للبشرة بيساعدها إنها تحتفظ بيها وتخرج بنسب معتدلة ومنضبطة.

حيث إن الجزىء الواحد من الهيالورنيك يجتذب حوله ضعف حجمه من الماء علشان كده بيبقى شبه الوسادة أو البالونة للبشرة

اللي بتعطي إمتلاء وحيوية ونضارة ورطوبة للبشرة وبكده هو المتحكم في المخزون المائي للبشرة علشان بيستخدم في الحقن علشان يحافظ على شباب البشرة دايمااا

ده غير الكلام الحالي أنه بيحفز طبعا تصنيع الكولاجين 

بيساعد جدا إنه يحسن البشرة و مظهرها 
علاج أيضا ضد الفطريات اللي ممكن تصيب الجلد 
وكمان بيقاوم ضرر الشمس على تلف الأنسجة والبشرة 



لكن مع الأسف مع التقدم في العمر يبدأ المخزون الموجود من حمض الهيالورنيك في البشرة يقل في بداية مرحلة الرشد كده من بعد 18 سنة ولكن في منتصف العشرينات كده تبدأ تظهر التجاعيد الخفيفة في بعض الاماكن في الوجه مثلا حولين الفم او حولين الحاجب أكثر الأماكن اللي فيها حركة وبيختلف ظهور التجاعيد من شخص للثاني بناء على عوامل وراثية  أو طبيعة البشرة أو فترة التعرض للشمس. 

ولأهميته الكبيرة دي  فهو عنصر مهم جدااااا في عالم الجمال والحفاظ على الشباب الدائم للبشرة لذلك الدكاترة بيستخدموه كحقن تحت الجلد وبيكون تاثيرها من 4-6 شهور 
أما المرطبات العادية فبيكون تأثيرها موضعي بس ومش بتقدر تخترق طبقات الجلد و تعطي تاثير أبعد من كده .
علشان كده بعد بحث العلماء توصلوا لتصنيع ملح اسمه صوديوم هيالورنات (sodium hyalurnate ) وده بيتميز أنه حجم جزيئاته مختلفة منها المتوسط ومنها الصغير و بكده يقدر يخترق  طبقات الجلد بسهولة. 
وطبعا كل ما كان حجم الجزيئات أصغر كل ما كان الاختراق أعمق و يحقق نتائج أحسن في الوقاية ومحاربة التجاعيد والخطوط الرفيعة ويعمل ويحافظ على امتلاء البشرة ونضارتها ويحافظ على مخزون الرطوبة بها. 

علشان كده نحرص أن المنتج اللي نشتريه يكون مكتوب عليه من مكوناته الصوديوم هيالورنات 



هتكلم عن تجربتي الشخصية من أول ما استخدمت الهيالورونيك أسيد

صراحة يا بنات من الحاجات اللي فرقت معايا جدا بقالى حاليا حوالى سنتين تقريبا بعتمده في الروتين اليومي بستخدمه كسيرم مش بس مرطبات يكون داخل فى مكوناتها.

وفعلا صدقا فرق معايا وشي تحسه دائما كأنه فيه ماء بمعنى تحسه فيه رطوبة وحيوية (ملحوظة أنا أصلا من الناس السيئة اللي مش بتشرب ماء كثير) بس وشي هتحس فيه نضارة ممتلىء كده مش فاضي و بهتان فيه حيوية. 

شكل الخطوط اللي حولين الفم أخف من الأول (مختفتش بس أخف من الأول ) وكذلك برضه الخطوط حول العين (الخطوط الرفيعة تحت العين زي ما هى خفيفة مش عميقة) 

آثار تصبغات قديمة (حبوب قديمة كانت دائما فى مكان الجبهة ) مبقتش موجودة بس أعتقد لأني بستخدم حاجات ثانية مش هو لوحده فمش هحكم على النقطة دي.

وأوقات كثير جدا الصراحة بستخدمه قبل الميكب وأنا بجهز بشرتي علشان احط ميكب عليها بيساعدني جدا أن البشرة تبقى أحسن والفاونديشن توزيعه يبقى أحسن (flawless look ) وأوقات مثلا لو فاونديشن ثقيل في دمجه بحط عليه نقطة أو اثنين بيخلي الدمج سهل جداااا و يدي لوك  أكثر من رائع. 

فأنا فعلا واقعه فى حب الهيالورنيك اسيد وبحس أنه بطل من ابطال السكين كير. 

جربت أنواع كثير في المدة اللى استخدمته فيها مش مصورة كل اللى جبته وجربته للأسف اللي بيخلص كنت برميه علطول

بس لما اجيب منتجات تانى هصورها أول بأول 

الصورة دي كنت الأول بستخدم حمض الهيالورنيك من Radha  beauty تقييمي ليه مثلا 7/10  كان مريحني كترطيب جدا بس مكنتش بحس أوي بحزئية الحيوية او إن وشي فيه نضارة.

بالصدفه صديقتى قالتلى على النوع التانى اللى فى الصوره دى وهو اسمه witch piggy hell pore control  من براند elizavecca / إليزافيكا ودي براند كوري و لأني بحب جدا المنتجات الكورية و الجمال الكوري والآسيوي بصفة عامة محط الأنظار والمنتجات المورية محل ثقة.

و فعلا عجبني جدا جدا و هعيده ثاني و اشتريه لما يخلص سيرم هيالورونيك أسيد إليزافيكا .
حسيت بأن بشرتي رطبة حيوية كده الخطوط الرفيعة اللي عندي مش بتزيد محسن من مظهر بشرتي مشاكل البشرة كمان أقل من الأول وطبعا الترطيب خاسة بشرتي رايقة.

( وحاجه كمان الصراحة حاسة إن شكل المسام أخف من الأول انا عندي مسام عند الخدين قرب الأنف كده حساها شكلها أقل من الاول مش مختفيه بس مظهرها أحسن و الطف )
فارتحت مع سيرم إليزافيكا الكوري جدا اورشحه بقوة.

و برضه صحيح من احسن الانواع اللى جربتها oz natural كنت مرتاحه معااااااه جداا جداا هو اغلى من دول بس فعلا يستحق فلوسه و مختلف عن اى منتج حمض هيالورنيك 
اللى لسه عاوزه اجربه هو حمض الهيالورونيك من البراند the ordinary لما هجربه هقول حسيت ايه لما استخدمه 
________
حاليا بعمله ابديت/ UPDATE 
وبقولكم جربت سيرم هيالورونيك أسيد من THE ORDINARY وعملت عنه ريفيو مفصل عن تركيبته بالظبط في الانستا بس حبيت أدون هنا (للاطلاع هنا)
من السيرم الجميلة فعلا ويستحق فلوسه جدا 
ترطيبه عالي وبيعمل على ترطيب البشرة من الخارج وبيوصل لطبقات البشرة الداخلية بكفاءة وبيدي نتائج هايلة وبيساعد أن يروق البشرة ويحسن من حالتها 
أرشحه جدا للاستخدام 
بالنسبالي هو أو السيرم الكوري إليزافيكا عطوني نتائج مرضية جدا.


 بس كده النهاردة 

حاولت أوضح كل حاجة أغطي الموضوع بشكل يعجبكم.
  دمتم جميلات .....

















عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming