MermaidCharming MermaidCharming

آخر الأخبار

جاري التحميل ...

خبز الشوفان الصحى المحسوب السعرات


خبز الشوفان الصحى  المحسوب السعرات 


النهارده هنتكلم عن وصفه سهله جداا و متجربه جداا جداا و صحيه ...

الفكره هنا اننا محتاجين نعدل من اكلنا مش بس علشان نخسر الوزن لا علشان يبقى الاستايل اليومى بتاعنا صحى و اكلنا يبقى احسن و على المدى نحمى جسمنا من الامراض 

علشان كده من الاتجاهات القويه جدا فى عالم التغذيه حاليا اننا نستغنى عن الدقيق (الطحين ) الابيض و ده لانه مش مفيد بالمره 
              
        طب ليه ؟؟ 

لانه غنى بالكربوهيدرات الاحاديه اللى هى سهله الهضم و التكسير فى جسمنا و ده هيخليه هضمه اسهل فى الجسم و 

بالتالى احساس الشبع يبقى اقل ومش بس كده  بيرفع مستوى السكر فى الدم فيستفز البنكرياس و يضغط عليه يفرز انسولين 

علشان يهضم السكر المرتفع و بالتالى مع الوقت ممكن يؤدى للاصابه بمرض السكرى و قله الالياف به ممكن تصيبنا بالامساك 





علشان كده البدايل الصحيه هى الاهم حاليا و واحد من اهم البدايل هو الشوفان 
طب ليه ؟؟


 ده لانه ببساطه غنى بالالياف و  البروتينات  هنلاقى ان كوب واحد من الشوفان يحتوى على اكتر من 10 جم من البروتين و 26 

ميكرو جرام من حمض الفوليك واكتر من  3 جم من الالياف  و كماننوع  الكربوهيدرات بالشوفان من النوع  المعقد  اللى بتاخد 

وقت فى التكسير فى جسمنا و باتالى احساس شبع اطوووول  بيساعد على تنظيم مستوى السكر فى الدم  و كمان الالياف 

بتساعدنا جداا جداا فى تنظيم الهضم و حركه الامعاء و بيساعد على تقليل الكوليسترول 

يعنى فوايده الصحيه كتير جداااااا و طرق استخدامه فى الوصفات كتير جداااااا 


و مادام نقدر نعمل الاكل الصحى و البديل الصحى بطعم حلو و طريقه سهله يبقى ليه لا ؟ 



النهارده هنعمل سوا وصفه خبز (عيش) صحى و مشبع و هى خبز الشوفان و هنبقى نعمل سوا وصفات بالشوفان تانى كتيرر ان شاء الله 
المكونات :


2 كاس و نصف شوفان (و ممكن يبقى كاس و نصف شوفان و كاس دقيق قمح كامل (دقيق اسمر /بر )) 
كاس ماء (حوالى 200 مل ) 
2 معلقه بذر الكتان صغيره (اختيارى )
معلقه خميره 
2 معلقه زبادى 
معلقه كبيره زيت 
رشه ملح 
معلقه عسل ابيض




الطريقه :  

فى كاس على جنب هنحط نص كميه الميا و معلقه الخميره و معلقه العسل و نسيبهم شويه لحد ما نلاقى ان الخميره عملت طبقه فوم (رغاوى ) و ده علشان نطمن ان الخميره فعاله 

فى طبق كبير هنحط الشوفان المطحون  و عليه رشه الملح و اخلطه كويس و بعدين نزود بذر الكتان و ده اختبارى علشان ازود 

القيمه الغذائيه مش اكتر ممكن ( نحط كمون ممكن نحط زعتر ) كل واحد واللى بيحبه 


ثم نزود  معلقتين الزبادى و نخلط جيدا و بعدين نزود معلقه الزيت 

وبعدين الكاس اللى فيها الخميره اللى جربناها 

وبعدين نزود الميا للى فاضله شويه شويه للحد ما العجين يبقى متماسك معانا شبه الصوره كده 

وممكن تحتاج شويه شوفان صغننين كمان 

كل ده نسبه الشوفان او الميا على حسب النوع  




لو حسبنا السعرات كل 100 غم حوالى 390 سعر 
احنا استخدمنا حوالى 250 غم يبقى 975 سعر 
معلقتين الزبادى حوالى 30 سعر 
معلقه لزيت الكبيره حوالى 120 سعر
معلقه العسل 30 سعر
2 معلقه من بذر الكتان 70 سعر 

المجموع 1220 سعر 
الكميه دى عملت معايا14  قطعه (ممكن اخر او اقل على حسب الحجم اللى بيتعمل ) 
كده القطعه الواحده فيها حوالى 87 سعر فقط و حجمه كويس جداا و مشبع جدااا 

طيب اخيرا كلمه على الماشى لان فيه ناس بتعتقد اننا علشان نخس لازم نبطل كربوهيدرات (نشويات ) و ده غلط لان عنصر غذائى مهم جسمنا بيحتاجه و مصدر طاقه 
الصح هو اننا اكل كل حاجه بس بحدود عدد سعراتى و كميه الكربوهيدرات المتاحه ليا فى اليوم 
و اعتمد فى نظامى على الكربوهيدرات المعقده مش البسيطه زى ما اتكلمنا من امثلتها ( الشوفان و الدقيق النحاله ...) 
بس كده

                                                 ودمتم جميلات ....




عن الكاتب

MERMAID CHARMING BY DR- HADIR

التعليقات


جميع الحقوق محفوظة

MermaidCharming